पुणे, ता. २ : देशातील सर्वात मोठी नागरी सहकारी बँक म्हणून ओळखल्या जाणाऱ्या सारस्वत को-ऑपरेटिव्ह बँक लिमिटेडमध्ये न्यू इंडिया को-ऑपरेटिव्ह बँक लिमिटेडचे विलीनीकरण झाले आहे.
रिझर्व्ह बँक ऑफ इंडियातर्फे बँकिंग नियमन कायदा १९४९ च्या कलम ४४ अ (४) आणि कलम ५६ नुसार या विलीनीकरणास अधिकृत मान्यता दिली आहे. तसेच दोन्ही बँकांच्या भागधारकांनी आपल्या सर्वसाधारण सभेत या योजनेला संमती दर्शवली असून, ही विलीनीकरण प्रक्रिया सोमवारी (ता. ४) लागू होणार आहे, अशी माहिती सारस्वत बँकने दिली.
या अंतर्गत सारस्वत बँक, न्यू इंडिया बँकेची संपूर्ण मालमत्ता, दायित्व आणि शाखांचा ताबा घेईल आणि न्यू इंडिया बँकेच्या सर्व शाखा आता सारस्वत बँकेच्या शाखा म्हणून कार्यरत होतील. तसेच, न्यू इंडिया बँकेचे ठेवीदार आणि ग्राहक आता ‘सारस्वत बँकेचे अधिकृत ग्राहक’ म्हणून गणले जातील. या निर्णयामुळे ग्राहकांना अधिक व्यापक, आधुनिक आणि विश्वासार्ह सेवा एका मोठ्या सहकारी बँकेच्या माध्यमातून मिळणार आहेत. बँकिंग व्यवहार अधिक सुलभ, सुरक्षित आणि तांत्रिकदृष्ट्या प्रगत होतील, असा विश्वास व्यक्त केला जात आहे.