पुणे, ता. २ : सॅलिसबरी पार्क येथील तिरुपती प्रतिष्ठान या संस्थेने महापालिकेचे सर्व नियम आणि अटींचे पालन करून भाडेतत्त्वावर घेतले आहे. त्याद्वारे परिसरातील नागरिकांसाठी समाजोपयोगी उपक्रम राबविण्यात येतात. त्याचा वापर खासगी कार्यालयासाठी होत नाही, असे तिरुपती प्रतिष्ठानने म्हटले आहे.
या संकुलाचा वापर खासगी कार्यालयासाठी करण्यात येत असल्याची तक्रार महापालिकेकडे करण्यात आली आहे. त्याबाबत खुलासा करताना प्रतिष्ठानने म्हटले आहे की, ‘‘या संकुलात स्पर्धा परीक्षेचे विद्यार्थी अभ्यास करतात. तसेच प्रभागातील नागरिक योगासने आणि ध्यानासाठी येतात. हे उपक्रम विनामूल्य राबविले जातात. काही घटक चुकीची तक्रार करीत आहेत. त्याबाबत अब्रूनुकसानीचा दावा दाखल करणार आहोत.’’