पुणे, ता. ४ : ससून रुग्‍णालयाच्‍या अस्थिव्‍यंगोपचार विभागात ज्‍येष्‍ठ महिलेच्‍या गुडघ्यावर रोबोटिक तंत्रज्ञानाच्‍या साह्याने (रोबोटिक आसिस्‍टेड) सांधे बदलाची (टोटल नी रिप्‍लेसमेंट) शस्त्रक्रिया शुक्रवारी करण्‍यात आली. ससूनमध्‍ये या प्रकारच्‍या शस्त्रक्रिया उपलब्‍ध झाल्‍याने उपचारांत अधिक अचूकता येण्‍यास मदत होत आहे.
या ६२ वर्षांच्या महिला रुग्ण दहा वर्षांपासून दोन्ही गुडघ्यांची झीज झाल्यामुळे व दुखण्याने लंगडत चालत होत्या. गेल्‍या चार महिन्यांपासून त्यांना घरातही चालणे मुश्कील झाले होते. तसेच गुडघे दुखण्यामुळे त्यांना रात्री नीट झोपही लागत नव्हती. त्यांना सध्या डाव्या गुडघ्याचा त्रास जास्त प्रमाणात होता. स्‍वतः अस्थिव्‍यंगोपचार शल्‍यविशारद असलेले अधिष्‍ठाता डॉ. एकनाथ पवार यांनी ही इतर डॉक्‍टरांसोबत ही शस्त्रक्रिया केली.

अशी झाली शस्त्रक्रिया
- रुग्‍णाच्‍या संपूर्ण पायाची सिटीस्कॅन तपासणी केली
- सिटीस्कॅनच्‍या प्रतिमांचे विशेष संगणकीय प्रोग्रामच्या साहाय्याने त्रिमिती प्रतिकृतीमध्ये (थ्रीडी प्रिंटिंग) रूपांतर केले
- त्यावरून कृत्रिम सांध्याची मापे गुडघा न उघडता अगोदरच ठरवली गेली
- रोबोटचे ट्रॅकर हे साधने पायावर बसवून गुडघ्याचा सांधा उघडला
- सांध्यांच्या पृष्ठभागाची मोजणी, विविध बिंदूंची माहिती ट्रॅकरच्या साहाय्याने घेतली
- रोबोटच्या कॉम्प्युटरने हाडांच्या कापांचे पर्याय दिले
- रोबोटने यांत्रिक हातावरील घासणीच्या साह्याने हाडावर विविध काप कमी वेळात, अचूकतेने घेतले.
- कृत्रिम सांध्याची चाचणी घेऊन कृत्रिम सांधे रोपण करण्यात आले

रोबोटिक साहाय्याने केलेल्‍या शस्त्रक्रियेचे फायदे
- हाडांचे काप रोबोटकडून प्रत्येक वेळेस बिनचूक घेतले गेल्याने कृत्रिम सांध्यांचे भाग रुग्णाच्या हाडावर तंतोतंत बसतात
- शस्त्रक्रियेनंतर दुखण्याचे प्रमाण अतिशय कमी आढळते
- मेदाची गुठळी रक्त प्रवाहात शिरण्याची शक्यता अतिशय कमी होते
- कमीत कमी जखम, रक्तस्राव आणि लवकर रुग्ण बरा होतो

या पथकाने केली शस्त्रक्रिया
अधिष्ठाता डॉ. एकनाथ पवार, अस्थिव्यंगोपचार विभाग प्रमुख डॉ. श्रीनिवास शिंत्रे यांच्या अधिपत्याखाली डॉ. प्रवीण लोंढे, डॉ. प्रदीप जाधव, डॉ. प्रफुल्‍ल इंगळे आणि डॉ. ऋत्विक शॉ यांनी ही शस्त्रक्रिया केली. तर भूलशास्त्र विभागाच्‍या प्रमुख सुरेखा शिंदे यांच्या मार्गदर्शनाखाली डॉ. विजय पाटील, डॉ. तुषार सिद्गुर आणि डॉ. नेहा झा यांनी भूल दिली.