पिरंगुट, ता. १६ : पुणे जिल्हा शिक्षण मंडळाच्या घोटावडे (ता. मुळशी) येथील न्यू इंग्लिश स्कूल या विद्यालयात विद्यार्थ्यांच्या कलागुणांना वाव देऊन गुणात्मक वाढीसाठी ग्रंथ प्रदर्शन, रांगोळी प्रदर्शन, विज्ञान प्रदर्शन व रांगोळी प्रदर्शन आदी उपक्रम राबविण्यात आले. त्यानिमित्त घेण्यात आलेल्या स्पर्धांत १८९ विद्यार्थ्यांनी सहभाग घेतला होता. रांगोळी स्पर्धेत लहान गटात १९, मोठ्या गटात २८, चित्रकला स्पर्धेत लहान गटात ३०, मोठ्या गटात ३५, तसेच विज्ञान प्रदर्शनात लहान गटात ३४, तर मोठ्या गटात ४३ विद्यार्थ्यांचा समावेश होता. या सर्व कलाकृतींना प्रेक्षकांनी उत्स्फूर्त दाद देऊन कौतुक केले.
विद्यार्थ्यांनी रेखाटलेल्या समाजप्रबोधनात्मक रांगोळीने उपस्थितांची मने जिंकली. आपल्या ब्रशच्या कुंचल्याने वस्तू चित्र, कोलाज, संकल्पचित्र, स्मरण चित्र यांचीही निर्मिती करणाऱ्या चिमुकल्यांना ग्रामस्थांनी उत्स्फूर्त दाद दिली. स्वनिर्मित प्रयोगाच्या नावीन्याच्या आविष्कारातून शाश्‍वत शेती, इंधन बचत, टेलिस्कोप, भूकंप संदेश यंत्रणा आदी नवनवीन प्रयोग विद्यार्थ्यांनी सादर केले होते. या वेळी संस्थेच्या प्रतिनिधींनी विविध उपक्रमांची पाहणी करून विद्यार्थ्यांचे कौतुक केले.
संस्थेच्या ग्राहक भांडाराचे अध्यक्ष संतोष पठारे, मुख्य लिपिक चंद्रहर्ष साने, ग्रंथपाल सुरेश जाधव आदींनी विद्यार्थ्यांचे कौतुक केले. या वेळी ग्रामपंचायतीच्या सरपंच सोनाली मातेरे, उपसरपंच भीमाजी केसवड, शाळा व्यवस्थापन समितीचे अध्यक्ष तात्या देवकर, तंटामुक्ती समितीचे अध्यक्ष किरण शेळके, प्रदीप गोडांबे, संतोष केसवड, मुख्याध्यापक एस. बी. देशमुख, पर्यवेक्षक महेंद्र बोऱ्हाडे तसेच पालक व ग्रामस्थ उपस्थित होते.