रावेत, ता. २९ : निवडणुकांच्या पार्श्वभूमीवर कायदा व सुव्यवस्था अबाधित राखण्यासाठी रावेत पोलिस ठाण्याच्या वतीने शस्त्र जमा करण्याची विशेष मोहीम राबविण्यात आली. या मोहिमेला सकारात्मक प्रतिसाद मिळत रावेत परिसरातील एकूण ४७ बंदूक परवानाधारकांनी बंदुका पोलिसांकडे जमा केल्या आहेत. निवडणूक काळात कोणताही अनुचित प्रकार घडू नये तसेच मतदान प्रक्रिया शांततेत पार पडावी, या उद्देशाने पोलिस प्रशासनाने ही कार्यवाही केली. शस्त्र जमा करण्याबाबत संबंधित परवानाधारकांना पूर्वसूचना देण्यात आली होती. त्यानुसार सर्वांनी सहकार्य करत नियमांचे पालन केले.
वरिष्ठ पोलिस निरीक्षक नितीन फटांगरे म्हणाले, ‘‘निवडणूक काळात शांतता व सुरक्षितता राखणे ही पोलिसांची जबाबदारी आहे. त्यासाठी शस्त्र जमा करण्याची कार्यवाही आवश्यक असून रावेत परिसरातील बंदूक परवानाधारकांनी केलेले सहकार्य कौतुकास्पद आहे.’’ या दक्षतेमुळे परिसरात शांतता व सुरक्षिततेचा संदेश गेला असून, नागरिकांनीही निवडणूक काळात कायदा व सुव्यवस्थेचे पालन करावे, असे आवाहन पोलिस प्रशासनाने केले आहे.
---