आघाडी, युतीची वाट न पाहता दोन्ही शिवसेनेची स्वबळाची तयारी

सकाळ वृत्तसेवा
सोलापूर, ता. १५ ः आगामी सोलापूर महापालिका निवडणुकीत युती किंवा आघाडीच्या समीकरणांची वाट न पाहता, शिवसेना उद्धव बाळासाहेब ठाकरे पक्ष व शिवसेना या दोन्ही पक्षांनी स्वबळावर लढण्याची तयारी सुरू केली आहे. दोन्ही पक्षांकडून उमेदवारी अर्ज स्वीकारण्याची प्रक्रिया सुरू झाली असून, इच्छुकांनी मोठा प्रतिसाद मिळत असल्याचे सांगण्यात आले आहे.

ठाकरे गटाकडे १५३ जणांचे अर्ज
​शिवसेना उद्धव बाळासाहेब ठाकरे पक्षाने निवडणुकीच्या तयारीला वेग दिला आहे. ठाकरे गटाच्या जिल्हाप्रमुखांकडे महापालिका निवडणुकीसाठी उमेदवारी मिळवण्यासाठी तब्बल १५३ जणांनी ऑनलाइन फॉर्म भरले आहेत. या मोठ्या प्रतिसादामुळे ठाकरे गटाचे मनोधैर्य वाढले आहे.

शिवसेनेची स्वबळाची तयारी
​दुसरीकडे, शिवसेनेनेही निवडणुकीच्या रिंगणात उतरण्याची तयारी पूर्ण केली आहे. जिल्हाप्रमुख अमोल शिंदे यांनी सोमवारपासून (१५ डिसेंबर) महापालिका निवडणुकीसाठी उमेदवारी अर्ज (फॉर्म) देण्यास सुरुवात केली आहे. ​पहिल्याच दिवशी शिवसेनेला उत्स्फूर्त मिळाल्याचे अमोल शिंदे यांनी सांगितले.
-------- -------- -------
युती होईल अशी आशा
शिवसेनेला महापालिका निवडणुकीत महायुती होईल अशी आशा आहे. जर युती झाली नाही तर स्वबळावर लढण्यासाठी शिवसेना तयार असल्याचे अमोल शिंदे यांनी स्पष्ट केले. स्वबळाच्या तयारीचा भाग म्हणून, प्रत्येक प्रभागात स्वतःच्या ताकदीवर उमेदवार उभा करण्याचा निर्णय घेण्यात आल्याचेही अमोल शिंदे यांनी सांगितले.