सासवड, ता. १५ : राज्यातील चार तहसीलदार, चार मंडळ अधिकारी आणि दोन ग्राम महसूल अधिकारी यांना अन्यायकारक पद्धतीने निलंबित केल्याच्या निषेधार्थ महाराष्ट्र राज्य महसूल कर्मचारी संघटनेच्या निर्देशानुसार महसूल कर्मचाऱ्यांनी बेमुदत संप पुकारला आहे. सोमवारी (ता. १५) दुपारी साडेतीननंतर सासवड येथील प्रशासकीय इमारतीच्या प्रवेशद्वासमोर ठिय्या मांडून पुरंदर तहसीलमधील महसूल कर्मचारी संपामध्ये सहभागी झाले. निलंबन मागे घेईपर्यंत कार्यालयाचे कामकाज बंद राहणार असल्याचे कर्मचाऱ्यांनी जाहीर केले आहे. या आंदोलनात तहसीलदार व नायब तहसीलदार संघटना, महसूल कर्मचारी संघटना, ग्राम महसूल अधिकारी व मंडळ अधिकारी संघटना, वाहनचालक संघटना, शिपाई संघटना आणि महसूल सेवक संघटना या सर्व संघटनांनी सहभाग घेतला आहे. ​दरम्यान, ‘‘महसूल कर्मचाऱ्यांनी कामात कसूर करायचा आणि स्वतःच्या मागणीसाठी संप करायचा. विमानतळाच्या नावाखाली कार्यालयात बसून रहायचे, सर्वमान्य नागरीकांनी फक्त हेलपाटेच मारायचे का?’’ असा सवाल प्रहार संघटनेच्या महिला प्रदेशाध्यक्षा सुरेखा ढवळे यांनी केला.