कात्रज, ता. २७ : पुणे जिल्हा दूध उत्पादक संघाच्या (कात्रज डेअरी) वार्षिक सर्वसाधारण सभेमध्ये दूध उत्पादक शेतकऱ्यांना प्रतिलिटर एक रुपयाचा फरक देण्याचा निर्णय घेण्यात आला होता. त्यानुसार, दर फरकाची पहिल्या हप्त्याची रक्कम ऑक्टोबर २०२३ रोजी दूध उत्पादकांना अदा केलेली होती. तर उर्वरित दूध दरफरकाची ४ कोटी १३ लाख रुपये रक्कम ९६९ दूध उत्पादक संस्थांमार्फत नुकतीच अदा केली असून याचा लाभ सुमारे पन्नास हजार दूध उत्पादकांना मिळाला.

पुणे जिल्हा दूध उत्पादक संघ शेतकऱ्यांना नेहमीच जास्तीत जास्त खरेदी दर देण्यास प्रयत्नशील राहिलेला असून दूध उत्पादकांना विविध इनपूट सुविधा संघामार्फत सवलतीच्या दरात पुरविण्यात येतात. तरी दूध उत्पादक व सर्व दूध संस्थांनी संघास स्वच्छ, ताज्या व भेसळ रहित उच्चतम गुणप्रतीच्या दूधाचा जास्तीत- जास्त पुरवठा करावा, असे आवाहन संघातर्फे अध्यक्ष केशरताई पवार यांनी केले आहे.