वाघोली, ता. २८ : वाघेश्वर मंदिर चौकात रविवारी सकाळी डंपरच्या धडकेत दुचाकीवरील महिलेचा जागीच मृत्यू झाला. भारती प्रकाश देठे (वय ४५, रा. विश्रांतवाडी) असे मृत महिलेचे नाव आहे. या परिसरात मागील पंधरा दिवसांत घडलेली ही दुसरी गंभीर घटना आहे.
या प्रकरणी पोलिस कर्मचारी दत्तात्रेय गोरे यांनी फिर्याद दिली. त्यानुसार डंपर चालक हिंमत जालिंदर कारके (वय ४२, रा. वाघोली) याच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, भारती देठे सकाळी आठच्या सुमारास दुचाकीवरून जात होत्या. वाघेश्वर मंदिर चौकात भावडी रस्त्याकडे वळणाऱ्या डंपरने त्यांच्या दुचाकीला धडक दिली. धडकेनंतर त्या थेट डंपरच्या मागील चाकाखाली गेल्या. गंभीर जखमी झाल्याने त्यांचा मृत्यू झाला. त्यांच्या दुचाकीचा क्रमांक पाहून पोलिसांनी नातेवाईकांशी संपर्क साधला. दरम्यान, याआधी १३ सप्टेंबर रोजी पुणे-नगर महामार्गावर खासगी बसच्या धडकेत रोहितकुमार अरुण बर्नावळ (वय १९) या तरुणाचा मृत्यू झाला होता.

नागरिकांकडून श्रद्धांजली
या दुर्घटनेनंतर नागरिकांनी छत्रपती श्री शिवाजी महाराज पुतळ्याजवळ कँडल लावून भारती देठे यांना श्रद्धांजली वाहिली. यावेळी प्रशासनाच्या निष्काळजीपणाचा निषेध व्यक्त करण्यात आला. श्रद्धांजली कार्यक्रमात प्रकाश जमधडे, सीमा गुट्टे, हिरा वाघमारे, धर्मेंद्र सातव, सुनील साळवे आदी उपस्थित होते.