वडगाव मावळ, ता. १५ : श्री संत तुकाराम सहकारी साखर कारखान्याच्या वतीने ऊस तोडणीसाठी आलेल्या मजुरांचे मोफत लसीकरण व आरोग्य तपासणी करण्यात आली.
कारखान्याचा सन २०२५-२६चा गळीत हंगाम सध्या सुरू आहे. ऊस तोडणीसाठी आलेल्या मजुरांसाठी श्री संत तुकाराम सहकारी साखर कारखाना, प्राथमिक आरोग्य केंद्र आढले व मायमर मेडिकल कॉलेजच्या वतीने मोफत आरोग्य तपासणी शिबिर आयोजित केले होते.
कारखान्याचे संस्थापक अध्यक्ष विदुरा नवले व उपाध्यक्ष अनिल लोखंडे यांच्या मार्गदर्शनाखाली कारखाना कार्यस्थळावरील साखर शाळेमध्ये हे शिबिर घेण्यात आले. १४५ ऊस तोडणी मजूर व ९५ कारखाना कर्मचारी यांची तपासणी करण्यात येऊन त्यांच्यावर मोफत औषधोपचार करण्यात आले. ऊस तोडणी मजुरांची लहान मुले तसेच गरोदर महिलांचे लसीकरण करण्यात आले. लहान मुलांना बीसीजी व व्हिटॅमिन ए चे डोस देण्यात आले. शुभांगी कदम, जितेंद्र धनगव्हाण, डॉ. स्नेहा कारकर, डॉ. प्रीती राठोड, नयना तापकीर, शीतल रडे आदींनी तपासणी शिबिरात सहकार्य केले. कारखान्याचे कार्यकारी संचालक साहेबराव पठारे, सचिव मोहन काळोखे, मुख्य शेतकी अधिकारी अजितकुमार सावंत, ऊस पुरवठा अधिकारी हिरामण गोपाळे, मेडिकल ऑफिसर बालाजी लोनवडे आदींनी संयोजन केले.