मार्केट यार्ड, ता. ५ : केंद्र सरकारने कांदा निर्यात शुल्कावर ४० टक्के वाढ केली आहे. यामुळे कांद्याच्या भावात घसरण सुरू झाली आहे. गुलटेकडी येथील मार्केट यार्डातील घाऊक बाजारात दर्जानुसार २० ते २२ रुपये प्रतिकिलोला भाव मिळत आहे. त्या तुलनेत मागील आठवड्यात कांद्याला २८ ते ३० रुपये प्रतिकिलो भाव मिळत होता. सध्या किरकोळ बाजारात प्रतिकिलो कांदा दर्जानुसार ५० ते ६० रुपये विकला जात आहे.

कांद्याच्या वाढत्या किमतीला आळा घालण्यासाठी केंद्र सरकारने मोठा निर्णय घेतला आहे. शनिवारी (ता.१९) ऑगस्टपासून कांद्याच्या निर्यातीवर ४० टक्के निर्यात शुल्क लागू केले आहे. हा निर्णय ३१ डिसेंबर २०२३ पर्यंत लागू केला आहे. याबाबत अधिसूचना काढली आहे. निर्यात शुल्काचा थेट परिणाम कांद्याच्या बाजारपेठांवर व उत्पादकांवर झाला आहे.

गुलटेकडी मार्केट यार्डातील कांदा बाजारात सोमवारी सुमारे ७०० टन कांद्याची आवक झाली होती. कांद्याच्या भावात वाढ होत असल्याने साठवणूक केलेला कांदा बाजारात आणण्यास शेतकऱ्यांनी सुरुवात केली होती. त्यातच भावात घट झाल्याने शेतकऱ्यांना नुकसानीस सामोरे जावे लागत आहे. त्यामुळे शेतकऱ्यांनी या निर्णयास विरोध केला आहे.

निर्यात शुल्क वाढीमुळे कांद्याच्या आवकेवर परिणाम झाला आहे. आधीच कांद्याचा भाव कमी होता. मागील काही दिवसांपासून ते वाढण्यास सुरुवात झाली होती. पण, या निर्णयामुळे पुन्हा भावात घसरण सुरू झाली आहे.
- नितीन पोळ, कांदा व्यापारी, मार्केट यार्ड

केंद्र सरकारने घेतलेला निर्णयामुळे शेतकऱ्यांचे नुकसान होणार आहे. आधीच शेतकरी संकटात असून त्यात कांद्याचे भाव पुन्हा घटू लागले आहेत. कांद्याला अजूनही अनुदान मिळालेले नाही. त्याबाबतही सरकारने तातडीने पावले उचलणे गरजेचे आहे.
- बाळासाहेब देसाई, शेतकरी, बार्शी