बालेवाडी(पुणे) : बाणेर येथील तुकाई टेकडीवर टेकडीच्या मागच्या बाजूला म्हणजेच पाषाणच्या बाजूला (ता.21) दुपारी एकच्या दरम्यान आग लागली. या आगीत वसुंधरा अभियान कडून जोपासना करण्यात आलेल्या अनेक झाडांचे नुकसान झाले असून या आगीमुळे मोठ्या प्रमाणात जैवविविधता नष्ट झाली आहे.                            

बाणेर येथे तुकाई टेकडी असून, येथे  2006 पासून वसुंधरा अभियानकडून हजारो झाडांचे वृक्षारोपण करून त्यांचे संवर्धनाचे काम लोकसहभागातून केले जाते. या टेकडीवर (ता. 21) रोजी दुपारी एकच्या दरम्यान पाषाणच्या बाजूला आग लागलेली. ही आग कशी लागली हे समजले नाही. पण, दरवर्षी फिरायला येणारे नागरिकांकडून असे दुष्कृत्य केली जातात याची माहिती वसुंधरा अभियान सदस्यांकडून देण्यात आली. या आगीमध्ये अनेक झाडे होरपळली असून या भागात निर्माण झालेल्या जैवविविधतेला या आगीची झळ पोहोचली आहे. या वर्षी भरपूर पाऊस झाल्याने टेकडीवर खूप गवत वाढले असून ते आता सुकले असल्यामुळे व टेकडीवरती सर्व बाजूंनी वारा असल्यामुळे थोड्यावेळात ही आग मोठ्या प्रमाणामध्ये पसरली. आग विझवण्यासाठी वसुंधरा अभियानचे सदस्य टेकडीवर पोहोचले  असून आग विझविण्याचे काम सुरू आहे. 

वसुंधरा अभियानकडून नागरिकांना कळकळीचे आव्हान
टेकडीवरती फेरफटका मारायला गेल्यावर जर कोणी असे दुष्कृत्य करत असेल किंवा धुम्रपान करून पेटती बिडी किंवा सिगारेट  टेकडीवरचे टाकत असेल तर त्यांना त्वरित अटकाव  करावा, अशी त्यांना विनंती करावी जेणेकरून टेकडीवरती आग लागून   झाडांचे, जैवविविधतेचे  नुकसान होणार नाही.