केडगाव (पुणे) : केडगाव (ता. दौंड) येथील गायरानातील अतिक्रमण रोखण्यासाठी युवकांनी वृक्षारोपणाची नामी शक्कल लढवली आहे. इतर कामात राजकारण असले तरी वृक्षारोपणाच्या कामांमध्ये येथील युवक गट-तट विसरून काम करत असल्याने ग्रामस्थ समाधान व्यक्त करत आहे. या युवकांनी एका महिन्यात 600 झाडे लावली आहेत. युवकांच्या या प्रयत्नांना केडगाव ग्रामपंचायतीने ही साथ दिली आहे. 

अन् अजित पवारांसमोरच फडणवीस म्हणतात, माझा आवाज...

केडगावच्या माळरानावर सहाशे झाडे ठिबक सिंचनसह लावण्यात आली आहेत. झाडे लावल्यानंतर पाऊस चांगला झाल्याने झाडांना टवटवी आहे. केडगाव हद्दीत 142 एकर गायरान जमीन आहे. अतिक्रमणामुळे ही जमीन संपत आली आहे. येथील देशमुख मळा परिसरात गायरान जमीन आहे. या जमिनीवर अनेक लोकांनी अतिक्रमण केले आहे. काही जणांनी जागा धरून कंपाउंड करून त्या चढ्या भावाने विकल्या आहेत.

... अन् मालकाच्या प्रेमापोटी बैलाने गिळलेले सोने केले परत

देशमुख मळा हा केडगाव ग्रामपंचायत स्वतंत्र महसुली भाग आहे. मात्र, विकास कामांसाठी अतिक्रमणामुळे जागा भविष्यात शिल्लक राहणार नाही, असे सध्याचे येथील चित्र आहे. हे संकट टाळण्यासाठी येथील युवकांनी एकत्र येत गावठाण जागेवर वृक्षारोपणाचा मोठा कार्यक्रम हाती घेतला. युवकांनी लोकवर्गणी करत सात एकर जागेचे सपाटीकरण केले असून चार एकर जागेला तार कंपाउंड करून त्यात ही झाडे लावली आहेत, असे ग्रामपंचायत सदस्य मनोज शेळके व धोंडिबा शेळके यांनी सांगितले. 

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

अशी मिळाली मदत 

• केडगाव येथील हॉटेल व्यावसायिक ब्रह्मानंद सुभाष निंबाळकर यांच्याकडून मोफत आठ हजार लिटरची पाण्याची लोखंडी टाकी 
• मनोज देशमुख यांनी या झाडांना स्वतःच्या विहिरीतून पाणी उपलब्ध करून दिले 
• "एक मित्र एक वृक्ष' संस्थेकडून 400 झाडे 
•  जवाहरलाल विद्यालयाचे माजी प्राचार्य विठ्ठल सानप व भालचंद्र महादेव टिळेकर यांनी प्रत्येकी 100 देशी झाडे 

केडगावमधील युवक विधायक काम करीत असल्याने ग्रामपंचायतीने त्यांना मदत केली आहे. ग्रामपंचायतीने वृक्षांसाठी दहा हजार फुटांचे ठिबक सिंचन केले आहे. याशिवाय चौदाशे फूट लांबीची पाइपलाइन करून ती ठिबकला जोडली. या पुढील काळातही या युवकांना मदत केली जाईल. 
- अजित शेलार (सरपंच), अशोक हंडाळ (उपसरपंच)