पुणे - रेल्वे स्थानकावर (Pune Railway Station) आई-वडिलांना सोडण्यासाठी गेलो होतो. मात्र प्लॅटफॉर्म तिकिटासाठी (Platform Ticket) कोणतीही ऑनलाइन सुविधा (Online Facility) नसल्याने सुट्या पैशांसाठी धावाधाव झाली. रोख असतील तर पैसे द्या; अन्यथा रांगेतून बाहेर होण्याचा अजब सल्ला तिकीट विक्रेत्या कर्मचाऱ्याने दिला. यामुळे नाहक त्रास सहन करावा लागला, असा अनुभव राकेश ठेकळे यांनी सांगितला.

रेल्वे स्थानकावर याबाबतची सत्यता पडताळली असता ऑनलाइन पेमेंटची सुविधा नसल्याचे समोर आले. तिकिटासाठी रांगेत उभ्या असलेल्या प्रवासी आणि त्यांच्या नातेवाइकांशी चर्चा केली असता, ‘‘अनेकदा पैसे सुटे नसतात, त्यामुळे तिकीट खरेदी करताना त्रास सहन करावा लागतो. सुटे पैसे आणण्यासाठी कसरत करावी लागते. त्यामुळे अनेक वेळा प्रवाशाला एकट्यालाच सोबत असलेले साहित्य घेऊन जावे लागते, असे सांगण्यात आले.

केंद्र सरकारकडून देशभरात डिजिटल इंडिया मोहीम राबविली जाते. या मोहिमेनुसार ऑनलाइन सुविधा देण्यासोबतच ऑनलाइन व्यवहार करावेत, असाही आग्रह धरला जातो. यूपीआय आयडीच्या माध्यामातून छोट्या ते मोठ्या व्यवहारांसाठी पसंती दिली जात असून, ते नागरिकांना सोयीचे ठरत आहे. असे असताना रेल्वे स्थानकावर प्लॅटफॉर्म तिकिटासाठी ऑनलाइन पेमेंट सुविधा अद्याप का सुरू करण्यात आली नाही? पैसे सुटे नसल्याने तिकीट नाकारले जाते. त्यामुळे प्लॅटफॉर्मवर जाऊ इच्छिणाऱ्यांना त्रास सहन करावा लागतो. रेल्वे विभागाने हा त्रास ओळखून ऑनलाइन सुविधा उपलब्ध करून द्यावी, अशी मागणी मोनिश शर्मा प्रवाशाने केली.

या भागाच्या मुख्यालयाला प्लॅटफॉर्म तिकिटासाठी ऑनलाइन पेमेंट सुविधा उपलब्ध करून देण्यासाठी पत्रव्यवहार केला आहे. मात्र ही सेवाच काही दिवसांत रेल्वे विभागाच्या अधिकारात जाणार आहे. त्यामुळे आता हा निर्णय रेल्वे विभागाकडून घेतला जाऊ शकतो, असे पुणे विभागाच्या आयआरडीसीच्या अधिकाऱ्यांनी सांगितले.

इंडियन रेल्वे डेव्हलपमेंट कॉर्पोरेशन विभागातर्फे (आयआरडीसी) प्लॅटफॉर्म तिकिट विक्री केली जाते. त्यामुळे ही सेवा थेट रेल्वे विभागाच्या अधिकारात नाही. काही दिवसांत ही सेवा रेल्वे विभागाच्या अधिकारात येणार आहे. ऑनलाइन पेमेंट सुविधेसाठी रेल्वे कठिबंध आहे. कारण दिवसाला एक हजार ते बाराशे प्लॅटफॉर्म तिकिटांची विक्री होत आहे, याची जाणीव रेल्वेला आहे.

- मनोज झंवर, जनसंपर्क अधिकारी, रेल्वे विभाग