पुणे : पोलिस आयुक्त अमिताभ गुप्ता यांनी शहरातील अवैध धंद्यांवर कारवाई करण्याचे आदेश दिल्यानंतर पुणे पोलिस 'अॅक्‍शन मोड'वर आले आहेत. गेल्या दोन दिवसात गुन्हे शाखेच्या पथकाने वेगवेगळ्या भागात सुरू असलेल्या जुगार अड्ड्यांवर छापे टाकून 38 जणांना अटक केली. या कारवाईत जुगार खेळण्याचे साहित्य आणि रोकड जप्त करण्यात आली. 

- ‘कोरोना’नंतर घ्या हृदयाची काळजी! तज्ज्ञांचा सल्ला​

पोलिस आयुक्त अमिताभ गुप्ता यांनी पोलिस आयुक्तपदाची सूत्रे स्वीकारल्यानंतर शहरात काही प्रमाणात खुनाच्या घटना घडल्या होत्या. त्याची गुप्ता यांनी गांभीर्याने दखल घेत वाढत्या गुन्हेगारीवर नियंत्रण मिळविण्याबरोबरच कायदा व सुव्यवस्था अबाधित ठेवण्याचा आदेश सर्व वरिष्ठ पोलिस अधिकाऱ्यांना दिला होता. त्याचबरोबर किरकोळ व गंभीर स्वरूपाचे गुन्हे घडण्यास कारणीभूत ठरणाऱ्या अवैध धंद्यांवरही कारवाई करण्यास सांगितले होते. 

त्यानुसार, गुन्हे शाखेच्या पथकाने शहरातील मध्यवर्ती भागासह स्वारगेट, दत्तवाडी, वारजे, येरवडा, हडपसर, बंडगार्डन, सहकारनगर परिसरात सुरू असलेल्या अवैध धंद्यांच्या ठिकाणांवर गेल्या दोन दिवसांपासून छापे घालण्यास सुरवात केली होती. विविध ठिकाणी सुरू असलेल्या जुगार अड्ड्यांवर कारवाई करून पोलिसांनी 38 जणांना अटक केली. त्यांच्याकडून जुगार खेळण्याचे साहित्य तसेच रोकड असा 49 हजार रुपयांचा मुद्देमाल जप्त केला. 

- Positive Story: बचत गटांतील महिलांनी खरेदी केल्या ४३ बस; संरक्षण राज्यमंत्र्यांनी घेतली दखल​

पोलिसांनी बेकायदा गावठी दारू तसेच ताडी विक्री प्रकरणात सात गुन्हे दाखल केले. या कारवाईत 464 लिटर गावठी दारू, 120 लिटर ताडी जप्त केली. त्यामध्येही सात जणांना अटक केली. तसेच तंबाखूजन्य पदार्थ, गुटखा विक्री प्रकरणातही पोलिसांनी कारवाई केली. त्यानुसार कोंढवा भागातील अजमेरा पार्क परिसरात अंमली पदार्थ विरोधी पथकाकडून कारवाई करण्यात आली. या कारवाईत टेम्पो तसेच गुटख्याची पोती असा 15 लाख 72 हजार रुपयांचा मुद्देमाल जप्त करण्यात आला. स्वारगेट परिसरात अमली पदार्थांची विक्री प्रकरणात दोघांना अटक करण्यात आली आहे. त्यांच्याकडून 25 हजार 500 रुपयांचा गांजा जप्त करण्यात आला.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)