दौंड (पुणे) : दौंड तालुक्यातील पाच व दौंड शहरातील चार, असे एकूण नऊ जणांना कोरोना विषाणूची बाधा झाली आहे. बाधितांमध्ये दौंड शुगर प्रायव्हेट लिमिटेड या खासगी साखर कारखान्याच्या वसाहतमध्ये राहणार्या एकाच कुटुंबातील चौघांचा समावेश आहे. दोन जणांचा कोरोना संसर्गामुळे मृत्यू झाला आहे. 

बॅकलाॅगच्या विद्यार्थ्यांना मोठा दिलासा, पुढच्या वर्गात प्रवेश मिळाला पण...

आलेगाव (ता. दौंड) येथील दौंड शुगर प्रायव्हेट लिमिटेड या खासगी साखर कारखान्याच्या कर्मचारी वसाहत मधील एकाच कुटुंबातील चार जणांना बाधा झाली आहे. सदर कुटुंब संगमनेर येथून नाशिक येथे एका रूग्णास भेटण्यासाठी गेले होते. आलेगाव येथे परतल्यानंतर त्यांना त्रास जाणवू लागल्याने दौंड शहरातील खासगी रूग्णालयात उपचार करण्यात आले. उपचारादरम्यान त्यांच्या घशातील स्त्राव तपासणीसाठी (स्वॅब टेस्ट) पाठविले असता पती, पत्नी व दोन मुले, असे एकूण चार जणांना बाधा झाली. केडगाव (ता. दौंड) ग्रामपंचायत हद्दीत पुणे - सोलापूर राष्ट्रीय महामार्गालगत एका कंपनीजवळ राहणार्या बाधित व्यक्तीच्या संपर्कात आल्याने एका ४२ वर्षीय नागरिकास कोरोनाची बाधा झाली आहे. बाधितांवर स्वामी चिंचोली (ता. दौंड) येथील कोविड केअर सेंटर मध्ये उपचार सुरू आहेत, अशी माहिती दौंड तालुका आरोग्य अधिकारी डॅा. अशोक रासगे यांनी दिली.

दौंड उप जिल्हा रूग्णालयाकडून २६ जणांचे घशातील स्त्राव तपासणीसाठी पुणे येथे पाठविण्यात आले होते. त्यापैकी शहरातील ख्रिश्चन कॅालनी जवळील अपार्टमेंट मधील ६७ वर्षीय महिला, शिवराज नगर येथील ५१ वर्षीय महिला, समतानगर येथील ४५ वर्षीय महिला आणि सरपंच वस्ती येथील ३४ वर्षीय तरूण, असे एकूण चार जणांना बाधा झाली आहे, अशी माहिती उप जिल्हा रूग्णालय अधीक्षक डॅा. संग्राम डांगे यांनी दिली.

लाॅकडाउनमध्ये रविवारपासून पुणेकरांना दिलासा

दरम्यान १८ जुलै रोजी लिंगाळी (ता. दौंड) येथील सावरकरनगर येथील ४५ वर्षीय बाधित तरूणाचा पिंपरी - चिंचवड येथे उपचार सुरू असताना मृत्यू झाला आहे. तर १९ जुलै रोजी दौंड शहरातील एका ६७ वर्षीय महिलेचा मृत्यू झाला आहे. 

by : Sagar Shelar