पुणे : भरधाव ट्रकने धडक दिल्यामुळे रस्त्याच्या कडेला उभारलेल्या दोघांचा मृत्यू झाला. ही घटना हडपसर परिसरात रविवारी रात्री आठ वाजण्याच्या सुमारास घडली. अपघातानंतर ट्रकचालक पसार झाला आहे.

संतोष शिवाजी हरपळे (वय ३७ रा. इंदिरा वसाहत, फुरसुंगी) आणि लक्ष्मण अण्णासाहेब पाटील (वय ३५, रा. चंदवाडी, फुरसुंगी) अशी मृत्युमुखी पडलेल्यांची नावे आहेत. याबाबत गणेश चोरघडे (वय ३७, रा. चंदवाडी, फुरसुंगी) यांनी फिर्याद दिली आहे. त्यावरून हडपसर पोलिसांनी ट्रकचालकाविरुध्द गुन्हा दाखल केला आहे.

पोलिसांनी दिलेल्या माहितीनुसार, संतोष आणि लक्ष्मण हे दोघे फुरसुंगीतील जुन्या कालव्याजवळ मांजरीकडे जाणाऱ्या रस्त्यावर बोलत उभे होते. त्या वेळी दहाचाकी भरधाव ट्रकने दोघांना धडक दिली. त्यात गंभीर जखमी झाल्यामुळे दोघांचा मृत्यू झाला.