खेड-शिवापूर : पुणे-सातारा महामार्गावर खेड-शिवापूर येथील एल. कुदळे अँड सन्स या पेट्रोलपंपावर पेट्रोल टाकण्याच्या बहाणा करून दुचाकीवर आलेल्या दोघांनी गुरुवारी रात्री कामगारांना रिव्हॉल्व्हरचा धाक दाखवून तब्बल दोन लाख ३७ हजार ५०० रुपयांची रोकड चोरून नेली.

- ताज्या बातम्यांसाठी डाऊनलोड करा ई-सकाळचे ऍप

सदर आरोपी सीसीटीव्ही मध्ये कैद झाले असून राजगड पोलिसांनी याप्रकरणी दोन अज्ञात चोरट्यांविरोधात गुन्हा दाखल केला आहे.

याबाबत पेट्रोल पंपावरील कामगार अमोल भीमराव पंडीत यांनी पोलिसांत फिर्याद दिली आहे. राजगड पोलिसांनी याबाबत माहिती दिली.

पिंपरीतील शिवसेनेच्या माजी शाखाप्रमुखाचा मुळशीत खून; पुरावे नष्‍ट करण्‍याचा प्रयत्‍न 

पुणे-सातारा रस्त्यावर खेड-शिवापूर गावच्या हद्दीत एल. कुदळे अँड सन्स नावाचा पेट्रोल पंप आहे. रात्री बारा वाजता पेट्रोल पंप बंद झाल्यानंतर पेट्रोल पंपावर अमोल भीमराव पंडित आणि सुदर्शन देविदास वानखेडे हे दोनच कामगार होते. पंपावर दिवसभर जमा झालेल्या पैशाचा हिशेब करून हे दोन कामगार ऑफिसमध्ये बसले होते. यावेळी पेट्रोल टाकण्याच्या बहाण्याने दोन जण दुचाकीवर पेट्रोल पंपावर आले. यावेळी त्यांनी हिंदीमध्ये "पेट्रोल है क्या?" अशी विचारणा केली. यावर या कामगारांनी पेट्रोल पंप बंद असल्याचे सांगून पेट्रोल देण्यास नकार दिला. यावेळी या अज्ञात आरोपींनी कामगारांना रिव्हॉल्व्हरचा धाक  दाखवून त्यांच्याकडील २ लाख ३७ हजार ५०० रुपये रक्कम घेतली. तसेच जाताना आरोपींनी दोन दूरध्वनी फोन आपटून कामगारांचे मोबाईल फोन हिसकावून घेऊन सातारा बाजूकडे दुचाकीवरून पलायन केले. पुढील तपास राजगड पोलीस करीत आहेत.

(संपादन : सागर डी. शेलार)