पुणे - जिल्ह्यातील दोन ग्रामपंचायतींचे विभाजन करावे आणि या विभाजनातून प्रत्येकी एक, याप्रमाणे दोन नवीन ग्रामपंचायतींची स्थापना करावी, अशी शिफारस पुणे जिल्हा परिषदेने बुधवारी (ता.2) विभागीय आयुक्त सौरभ राव यांच्याकडे केली आहे. यामुळे जिल्ह्यात आणखी दोन नवीन ग्रामपंचायती अस्तित्वात येणार आहेत. यामुळे जिल्ह्यातील एकूण ग्रामपंचायतींची संख्या 1 हजार 409 वर जाणार आहे.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

जिल्हा परिषदेच्या या शिफारशीनुसार जुन्नर तालुक्‍यातील हिवरे बुद्रूक ग्रामपंचायतीचे विभाजन केले जाणार आहे. या ग्रामपंचायतीच्या विभाजनानंतर पुनर्वसित गावठाण असलेल्या कैलासनगरला स्वतंत्र नवी ग्रामपंचायत होणार आहे. याशिवाय खेड तालुक्‍यातील बिबी ग्रामपंचायतीचे विभाजन करून, बुरसेवाडी ही स्वतंत्र ग्रामपंचायत अस्तित्वात येणार आहे.

पुणे : बेशिस्त वाहनचालकांनो, आता तुमच्या खिशाला लागणार कात्री

याआधी मार्च महिन्यात आठ नवीन ग्रामपंचायतींची स्थापना झाली आहे. या नव्या ग्रामपंचायतींमुळे जिल्ह्यातील एकूण ग्रामपंचायतींची संख्या एक हजार 407 झाली होती. त्यात आणखी दोनची भर पडणार आहे. संबंधित ग्रामपंचायतींच्या मागणीनुसारच ग्रामपंचायत विभाजनाचा प्रस्ताव हा संबंधित पंचायत समितीकडून जिल्हा परिषदेकडे येत असतो. या प्रस्तावाची छाननी केल्यानंतर जिल्हा परिषदेच्यावतीने मुख्य कार्यकारी अधिकारी हे विभागीय आयुक्तांना याबाबत शिफारस करत असतात. या शिफारशींच्या आधारे विभागीय आयुक्त राज्य सरकारकडे प्रस्ताव पाठवत असतात. या प्रस्तावाला मंजुरी मिळाल्यानंतर नवीन ग्रामपंचायत अस्तित्वात येत असते, असे ग्रामपंचायत विभागाचे उपमुख्य कार्यकारी संदीप कोहीनकर यांनी सांगितले.

Edited By - Prashant Patil