पुणे : लष्कराच्या तिन्ही दलांच्या अधिकाऱ्यांना तांत्रिक प्रशिक्षण देणाऱ्या गिरीनगर येथील ‘मिलिटरी इन्स्टिट्यूट ऑफ टेक्नॉलॉजी’ संस्थेच्या प्रमुखपदी एअर व्हाइस मार्शल व्ही राजशेखर यांची नियुक्ती करण्यात आली आहे. त्यांनी मेजर जनरल हरी सिंह यांच्याकडून शुक्रवारी प्रमुखपदाचा पदभार स्वीकारला.(V Rajasekhar appointed head of Military Institute of Technology)

एअर व्हाइस मार्शल राजशेखर हे आयआयटी मुंबईचे माजी विद्यार्थी आहेत. हवाईदलातील ३४ वर्षांच्या कार्यकाळात त्यांनी हवाई मुख्यालय आणि प्रशिक्षण मुख्यालयामध्ये विविध महत्त्वाच्या पदांवर काम केले आहे. तसेच हवाईदलाच्या तांत्रिक महाविद्यालयात प्रशिक्षक प्रमुख म्हणून काम केले आहे. त्याचबरोबर विविध संवाद प्रकल्पांचे संचालनही त्यांनी केले आहे. त्यांनी मिराज-२००० एव्हीओनिक्स आणि सिस्टम्सच्या देखभालीशी संबंधित जबाबदारी देखील पार पाडली आहे. जयपूर येथील एएफसीईएल मोबाईल स्विचिंग सेंटरच्या प्रमुखपदावर ही ते कार्यरत होते.आंतरराष्ट्रीय नियतकालिकांमध्ये त्यांचे कृत्रिम बुद्धीमत्ता (एआय) आणि न्यूरल नेटवर्क्सच्या क्षेत्रातील विविध शोधनिबंध प्रकाशित झाले आहे. तसेच वेगवेगळ्या माहिती तंत्रज्ञान आणि टेलिकॉम परिषदांमध्ये वक्ते म्हणून सातत्याने सहभाग घेतला आहे.