पुण्यात गेल्या काही दिवसांत गुन्हेगारीने डोके वर काढले आहे. राष्ट्रवादी काँग्रेसचे माजी नगरसेवक वनराज आंदेकर यांची रविवारी रात्री गोळ्या झाडून हत्या करण्यात आली होती. त्यांच्यावर पाच गोळ्या झाडण्यात आल्या. गोळीबारानंतर वनराज आंदेकर यांना गंभीर अवस्थेत रुग्णालयात दाखल करण्यात आले, तेथे उपचारादरम्यान त्यांचा मृत्यू झाला होता.

आता वनराज आंदेकर यांच्या वडिलांनी केलेल्या तक्रारीवरून त्यांच्या बहिणींना पोलिसांनी अटक केली आहे. आतापर्यंत या प्रकरणात समर्थ पोलिसांनी 10 ते 12 आरोपींची ओळख पटवली असून काही जणांना अटक केली आहे.

पुण्यातील नानापेठ येथील डोके तालीम परिसरात रविवारी रात्री साडेआठच्या सुमारास आंदेकरांच्या हत्येची घटना घडली होती.

दरम्यान हत्या झाल्यानंतर आंदेकर यांच्या नातेवाईकांवर खुनाचा संशय व्यक्त होत होता. आता आंदेकरांच्या वडिलांनी त्यांच्याच मुलींविरोधात केलेल्या तक्रारीनंतर पोलिसांनी ही अटक कारवाई सुरू केली आहे.

आंदेकर यांच्या हत्येची घटना ताजी असतानाच काल रात्री हडपसरमध्येही एका फायनान्स मॅनेजरची हत्या झाली होती. त्यामुळे शहरातील सरक्षतेबाबत नागकरिकांकडून भीती व्यक्त करण्यात येत आहे.

सीसीटीव्हीत हत्येचा थरार कैद

दरम्यान रविवारी झालेल्या या हत्येच्या घटनेचे काही सीसीटीव्ही फुटेजस समोर आले आहेत. यामध्ये सुमारे 12 हल्लेखोर आंदेकर यांच्यावर हल्ला करताना दिसत आहेत. हे हल्लेखोर 5-6 दुचाकींवर येत एकाच वेळी आंदेकर यांच्यावर हल्ला करत आहेत.

यावेळी वनराज आंदेकरांनी जीव वाचवण्यासाठी पळून जाण्याच प्रयत्न केला तेव्हा एकाने त्यांच्या कानाजवळ गोळी झाडली. पुढे आंदेकर रक्ताच्या थारोळ्यात पडल्यानंतर हल्लेखोरांनी हवेत गोळीबार केला.