सातगाव पठार (पुणे) : कोरोनामुळे गावोगावचे आठवडे बाजार बंद झाले असल्याने भाजीविक्रेत्यांना भाजी विकण्यासाठी पर्यायी जागा शोधावी लागत आहे. त्यामुळेच नामी शक्कल लढवत या भाजीविक्रेत्या शेतकऱ्यांनी पुणे-नाशिक राष्ट्रीय महामार्गावर पेठवरून खेडच्या दिशेने जाताना खेड घाटाच्या सुरवातीला महामार्गाच्या कडेलाच भाजीविक्री सुरु केली आहे. येथे स्वच्छ व ताजा भाजीपाला मिळत असल्याने महामार्गावरून प्रवास करणारे प्रवासीदेखील भाजी घेण्यासाठी या ठिकाणी थांबत आहेत.

...तर हॉस्पिटलवर कायदेशीर कारवाई करा; उपमुख्यमंत्र्यांनी दिले आदेश​

कोरोनामुळे अनेक बदल पहावयास मिळत आहे. त्यातीलच हा एक बदल आहे. कारण गावोगावचे आठवडे बाजार गेले कित्येक महिने बंद असल्याने भाजी विक्रेते हवालदिल झाले आहेत. त्यामुळे भाजीविक्रेत्यांनी भाजी विकण्यासाठी शेवटी महामार्गाचा पर्याय निवडत महामार्गावरून प्रवास करणाऱ्या प्रवाशांना आपले ग्राहक बनविले आणि त्यांची ही शक्कल चांगलीच फायदेशीर ठरत आहे. 

- मोठी बातमी : पुण्यात कोरोना रुग्णांबाबत नोंदविले गेलेत दोन रेकॉर्ड; वाचा सविस्तर​ 

पहिल्यांदा एकच भाजीवक्रेता आला. त्यांनतर त्याचे पाहून इथे आता जवळच्या गावांतून अनेक शेतकरी आपल्या शेतात पिकवलेली भाजी विक्रीसाठी घेवून येत आहेत. महामार्गावरून प्रवास करणाऱ्या प्रवाशांच्या अगदी सहजच डोळ्यांत भरेल असा हा भाजीपाला दिसत असल्याने आपसूकच इथून प्रवास करताना अनेक प्रवासी गाडी थांबवून भाजीपाला खरेदी करत आहेत.

- पुणे जिल्ह्यातील नागरिकांनो सतर्क राहा; हवामान विभागानं दिलाय 'ऑरेंज अलर्ट'!​

स्वच्छ आणि ताजा भाजीपाला मिळत असल्याने ग्राहकदेखील खूश होतात आणि शेतकऱ्यांनादेखील दोन पैसे हाताशी मिळत आहेत. थेट शेतातून काढलेली भाजी मिळत असल्याने परिसरातील गावांतील नागरीक देखील भाजी खरेदीसाठी इथे येतात. त्यामुळे भविष्यात भाजीबाजाराचे हे एक चांगले ठिकाण बनू शकते अशी या विक्रेत्यांना अाशा आहे.