पुणे- लोकसभा निवडणुकीच्या तिसऱ्या टप्प्यातील मतदान पार पडत आहे. देशात एकूण सात टप्प्यात मतदान होणार आहे. या पार्श्वभूमीवर नेत्यांकडून एकमेकांवर आरोप-प्रत्यारोप, चिखलफेक सुरु आहे. त्यातच राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी एक व्हिडिओ आपल्या सोशल मिडिया हँडलवर शेअर केला आहे. हा व्हिडिओ सोशल मीडियावर सध्या व्हायरल होत आहे.

व्हायरल व्हिडिओमध्ये दिसतंय की, 'राष्ट्रवादी काँग्रेस अजित पवार गटाचे नेते आणि इंदापूरचे आमदार दत्तात्रय भरणे हे एका व्यक्तीशी भांडत आहेत. व्यक्तीला शिवीगाळ देखील केली जात आहे. तुम्हाला माझ्याशिवाय कोणी नाही. मलाच तुमच्या मदतीला यावं लागेल, अशाप्रकारची वक्तव्य ते करताना दिसत आहेत.' रोहित पवारांनी हा व्हिडिओ पोस्ट केलाय.

रोहित पवार पोस्टमध्ये काय म्हणालेत?

केवळ दडपशाहीपुढं न झुकता स्वाभिमानाने बुथवर काम करणाऱ्या कार्यकर्त्यांना अजितदादा मित्र मंडळाचे सदस्य, माजी मंत्री आणि इंदापूरचे आमदार हे कशा अर्वाच्च भाषेत शिवीगाळ करतात आणि धमकी देतात ते या व्हिडिओत बघा… विशेष म्हणजे ज्यांच्याशी ते असं वागतात ही त्यांचीच भावकी आणि बारा बलुतेदारांपैकी एक आहेत… ही चिडचिड खूप काही सांगून जाते. पण आजच्या लढाईत स्वाभिमानी कार्यकर्ता आणि मतदार कोणत्याही धमक्यांना आणि दपडशाहीला भीक घालणार नाही!, असं पवार म्हणाले आहेत.

भरणे यांच्याकडून यावर प्रतिक्रिया देताना सांगण्यात आलंय की, 'दोघांमधील भांडणे ते सोडवत होते.' यावर रोहित पवार यांनी प्रतिक्रिया देताना म्हटलंय की, व्हिडिओ पाहून ते भांडण सोडवत होते असं वाटत नाही. ते समोरच्या व्यक्तीला शिवीगाळ करत आहेत. एकाच व्यक्तीला ते बोलत आहेत. त्यामुळे अशा पद्धतीने कोण भांडण सोडवतं? दरम्यान, या व्हिडिओवरुन दोन्ही पक्षांमध्ये वाद निर्माण होणार आहे. सदर व्हिडिओ कधीचा आहे किंवा कुठला आहे कळू शकलेलं नाही. तसेच, व्हिडिओच्या सत्यतेची पृष्टी 'सकाळ माध्यम समूह' करत नाही.