वाघोली - बुर्केगाव (ता. हवेली) मध्ये पतीने पत्नीचा कुऱ्हाडीने घाव घालून खून केल्याची धक्कादायक घटना सोमवारी मध्यरात्री घडली. या प्रकरणी पतीवर खुनाचा गुन्हा दाखल करण्यात आला असून त्याला अटक करण्यात आली आहे. अशी माहिती लोणीकंदचे वरिष्ठ पोलीस निरीक्षक सावळाराम साळगावकर यांनी दिली.

लक्ष्मीबाई बाबा जाधव (वय ४५, रा. बुर्केगाव ) असे खून झालेल्या महिलेचे नाव आहे. तर, पती बाबा जाधव याच्यावर गुन्हा दाखल करण्यात आला आहे. पोलिसांनी दिलेल्या माहितीनुसार, जाधव कुटुंबीय बुर्केगावात राहत होते. पती पत्नीवर चारित्र्याच्या संशय घेत होता. त्यामुळे त्यांच्यात वाद होत होता. सोमवारी रात्री दोघांचा पुन्हा वाद झाला.

दरम्यान, मध्यरात्री बाबा याने  लक्ष्मीबाई यांचा कुऱ्हाडीने वार करून खून केला. त्यानंतर ती रक्ताच्या थारोळ्यात असताना बाबाही झोपला. दरम्यान त्यांची मुलगी निकिता पवार आईला फोन करत होती. मात्र आई फोन उचलत नाही. ती कामावर देखील न आल्याने ती घरी आली.

तेव्हा घर बंद होते. त्यांनी घराचा दरवाजा तोडून आत प्रवेश केला. तेव्हा बाबा हा झोपलेला तर आई रक्ताच्या थारोळ्यात पडलेली दिसून आली. त्यानंतर त्यांनी लोणीकंद पोलिसांना घटनेची माहिती दिली. लोणीकंद पोलिसांनी तात्काळ घटनास्थळी धाव घेतली. पुढील तपास लोणीकंद पोलीस करीत आहेत.