हडपसर (पुणे) : प्रथमा ( ए ) सोसायटीत सचिन तुकाराम गायकवाड ( वय ३०, रा. रामटेकडी, हडपसर) या तरूणाचा शनिवारी पाण्यात पाय घसरून डोक्यावर पडल्याने दुर्देवी मृत्यू झाला. मात्र अदयापही सोसायटीच्या पदाधिका-यांनी कोणतीही कार्यवाही केलेली नाही. त्यामुळे रहिवाशांनी सोसायटीचे चेअरमन व पदाधिका-यांवर पोलिस कारवाई करण्याचा इशारा दिला आहे. इमारतीत व पार्कींगमध्ये जागोजागी साठलेला कचरा...तुंबलेल्या ड्रेनेज लाईन...मैलावाहिन्या तुंबल्याने पार्कींगमध्ये साठलेला मैला व त्याची दुर्गंधी...अस्वच्छतेमुळे डासांचे वाढते प्रमाण... अशी विदारक परिस्थिती रामटेकडी येथील प्रथमा ( ए ) बिल्डींगमध्ये आहे.

नववी ते बारावीच्या विद्यार्थ्यांसाठी आनंदाची बातमी; काय आहे वाचा

त्यामुळे आजारी पडणाऱ्या रहिवाशांचे प्रमाण वाढले आहे. झोपडपट्टी पुनर्विकास प्राधिकरणाच्या (एसआरए) योजनेतून ही इमारत बांधली आहे. याबाबत रहिवाशी कैलास कसबे म्हणाले, बिल्डरने सोसायटीकडे प्रत्येक सभासदाच्या नावे २० हजाराची ठेव ठेवली आहे. तसेच दर महिन्याला आम्ही मेंन्टेन्स भरतो. इमारतीवर चार मोबाईलचे टॅावर असून त्याचे सोसायटीला भाडे मिळते. मात्र सोसायटीच्या संचालकांकडून कोणत्याही सुविधा दिल्या जात नाही. त्यातूनच सोसायटीत पाय घसरून सचिनचा मृत्यू झाला. त्यामुळे सोसायटीचे चेअरमन व संचालक मंडळाविरोधात आम्ही रहिवाशी मिळून पोलिस ठाण्यात तक्रार देणार आहोत.

- ताज्या बातम्यांसाठी डाऊनलोड करा ई-सकाळचे ऍप

अजय साळुंखे म्हणाले, सोसायटीत मैलापाणी वाहून नेणारी वाहिनी नादुरूस्त झाली आहे. त्यामुळे सर्व मैला पार्कींगमध्ये साचला आहे. त्यात आळ्या देखील झाल्या आहेत. नाकाला रूमाल बांधूनच याठिकाणाहून जावे लागते. याबाबत अनेकदा चेअरमनकडे तक्रारी केल्या आहेत. मात्र, आमच्या तक्रारीची दखल घेतली जात नाही. त्यामुळे नागरिकांचे आरोग्य धोक्यात आले आहे. 
अनिल देडे म्हणाले, आमच्या सोसायटीत १७६ सदनिका आहेत. सोसायटीतील सांडपाणी वाहून नेणा-या वाहिन्या तुंबलेल्या आहेत. हे पाणी पार्कींगमध्ये पडते. त्यामुळे शेवाळे साठलेले आहे. त्यावरून अनेक रहिवाशी पाय घसरून पडतात. त्यातूनच सचिनचा बळी गेला.

- पुण्याच्या बातम्या वाचण्यासाठी येथे ► क्लिक करा

सोसायटीच्या चेअरमनकडे तक्रार केल्यानंतरही कोणतीही उपाययोजना होत नाही. इमारतीची देखभाल व दुरूस्ती नियमितपणे केली जात नाही. त्यामुळे सोसायटीतील तरूणच अनेकदा सोसायटीची स्वच्छता करतात. 
डॅा. किशोर शहाणे व झोपडपट्टी सुरक्षा दलाचे राज्य संघटक दत्ता कांबळे यांनी देखील सोसायटीची पहाणी केली व सचिनच्या मृत्यूप्रकरणी सोसायटींच्या चेअरमन व संचालकांन विरोधात पोलिस ठाण्यात तक्रार दाखल करणार असल्याचे सकाळशी बोलताना सांगितले.

 निष्काळजीपणाचा ‘व्हायरस’ पसरतोय

याबाबत सोसायटीचे चेअरमन काशिनाथ कुचेकर म्हणाले, सोसायटीतील सुमारे १२५ जण मेंन्टेनंस भरत नाहीत. रहिवाशी इमारतीमधील सुविधांचा योग्य रितीने वापरत नाही. त्यामुळे अनेकदा देखभाल व दुरूस्ती केल्यानंतर जैसे थे परिस्थिती होते. नागरिकांनी सर्व सुविधा आपल्यासाठी आहेत, असे समजून त्याचा वापर करायला हवा.