पुणे - साध्यासोप्या उपायांमुळे या आठवड्यात पुणे महानगर परिवहन महामंडळाचे (पीएमपी) रोजचे उत्पन्न ४० लाख रुपयांनी वाढल्याचे समोर आले आहे. ‘पीएमपी’चे रोजचे उत्पन्न आता १ कोटी ७० लाखांपर्यंत पोचले आहे. 

ताज्या बातम्यांसाठी डाऊनलोड करा ई-सकाळचे ऍप

शहरात मार्गांवर नव्या आणि जुन्या बसगाड्या उतरवल्यानंतर प्रवासी संख्येत वाढ होऊन उत्पन्न वाढण्याची अपेक्षा होती. मात्र गेल्या दोन महिन्यांपासून रोज १ हजार ५५० बसगाड्या मार्गांवर असूनही रोजचे उत्पन्न १ कोटी ४० लाख रुपयांच्या आसपासच राहिले होते. यामुळे त्यामागील कारणे ‘पीएमपी’ने जाणून घेतली. त्यात बसचालक, वाहक आणि चेकर यांच्या चुकांचा परिणाम उत्पन्नावर होत असल्याचे दिसून आले. बसगाड्यांवरील मार्गाचा फलक ठळकपणे दिसत नसल्याने प्रवाशांची अडचण होत असल्याचे सांगण्यात आले. थांब्यापासून बस लांब थांबणे, गॅस भरण्याच्या नावाखाली फेऱ्या रद्द करणे आदी कारणांमुळे अपेक्षित उत्पन्न मिळत नव्हते. 

काय आहे जॉर्जियन पिझ्झाची कहाणी?

‘आता मार्गाच्या फलकांपासून ते प्रत्येक थांब्यावर बस कुठे आणि किती वेळ थांबते, चालक वेळेत आले का आदी बाबींची तपासणी होत आहे. या प्रकरणी चालक-वाहकांविरोधात दंडात्मक कारवाई होत असल्याने चुका कमी होत आहेत. प्रवासी संख्येत ५० हजारांनी वाढ झाली आहे,’’ असे वाहतूक व्यवस्थापक अनंत वाघमारे यांनी सांगितले. मार्गाचा फलक न लावणाऱ्या ठेकेदारांच्या गाड्यांना एक हजार रुपये दंड करण्यात येत आहे.