कडूस (पुणे) : दिव्यांगांसाठी खरेदी केलेल्या व्हीलचेअरर्स खेड पंचायत समितीच्या इमारतीत गेल्या वर्षभरापासून धूळखात पडून आहेत. ही खरेदी नक्की कोणी आणि कशासाठी केली? त्यासाठी कोणता निधी वापरला? याबाबत माहिती देण्यास पंचायत समिती प्रशासन हात वर करत आहेत. त्यामुळे या धूळ खात पडलेल्या या व्हीलचेअरचे गौडबंगाल नेमके आहे तरी काय? असा सवाल तालुक्यातील दिव्यांगांनी उपस्थित केला आहे.
खेड पंचायत समिती आवारातील प्रतीक्षा कक्षात नव्या कोऱ्या व्हीलचेअर गेल्या वर्षभरापासून धूळखात पडून आहेत. या व्हीलचेअर लोकसभा निवडणुकीवेळी तालुक्यातील प्रत्येक ग्रामपंचायतीने मतदान केंद्रावर दिव्यांगांसाठी खरेदी केल्याची प्राथमिक माहिती आहे. ग्रामपंचायतींनी खरेदी केलेल्या या व्हीलचेअर पंचायत समितीत कशासाठी? असा सवाल उपस्थित होत आहे. लोकसभा निवडणूक होऊन एक वर्ष झाले. वर्षभरापासून या व्हीलचेअर पंचायत समिती इमारतीतील बाजारगाळ्यात कुलूपबंद ठेवल्या होत्या. बाजारगाळे वापरात आणल्याने सध्या या व्हीलचेअर पंचायत समिती आवारातील कोरोना कक्षातील एका कोपऱ्यात ठेवल्या आहेत. बाजारगाळ्यातून कोरोना कक्षात आणून ठेवल्याने या व्हीलचेअर आता सर्वसामान्यांच्या नजरेस येत असल्याने याबाबत प्रश्न विचारले जाऊ लागले आहेत.
धूळखात असलेल्या बॉक्समध्ये काय आहे? याबाबत दिव्यांगांनी पंचायत समिती प्रशासनाकडे विचारणा केली. परंतु, याबाबत प्रशासनाकडून माहिती मिळाली नाही. बॉक्समध्ये व्हीलचेअर असल्याचे निदर्शनास आल्या. त्यामुळे या व्हीलचेअर नक्की कोणासाठी आणि धूळखात का पडल्या आहेत? असा सवाल दिव्यांगांनी उपस्थित केला आहे. या व्हीलचेअरचे गौडबंगाल नक्की आहे तरी काय? यात मोठा गैरव्यवहार झाल्याची शक्यता दिव्यांग वर्तवित आहेत.
याबाबत पंचायत समितीचे गटविकास अधिकारी अजय जोशी यांना विचारले असता त्यांनी सांगितले की, लोकसभा निवडणुकीपासून या व्हीलचेअर या ठिकाणी पडलेल्या आहेत. त्यावेळी मी या ठिकाणी कार्यरत नव्हतो. दिव्यांगांना सुखकरपणे मतदान करता यावे, याकरिता लोकसभा निवडणुकीवेळी प्रत्येक मतदान केंद्रासाठी या खरेदी केलेल्या असाव्यात. नक्की कोणी आणि कशातून खरेदी केल्या? या पंचायत समितीत कशा काय? याची माहिती दोन दिवसात घेतो.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.