पुणे : सोने खरेदीमध्ये गुंतवणूक केल्यास जादा परतावा मिळेल, असे आमिष दाखवून लक्ष्मी रस्त्यावरील एका नामवंत सराफी पेढीकडून एका महिलेसह तिच्या नातेवाईकांची तब्बल एक कोटी रुपयांची फसवणूक झाल्याचा प्रकार उघडकीस आला आहे. याप्रकरणी एका सराफी पेढीच्या मालकासह पाचजणांविरुद्ध कोथरुड पोलिस ठाण्यात फसवणुकीचा गुन्हा दाखल करण्यात आला आहे.

याप्रकरणी 'मराठे ज्वेलर्स'चे मालक मिलिंद उर्फ बळवंत अरविंद मराठे, कौस्तुभ अरविंद मराठे, मंजिरी कौस्तुभ मराठे, नीना मिलिंद मराठे यांच्याविरुद्ध गुन्हा दाखल करण्यात आला आहे. याप्रकरणी शुभांगी कुटे (रा. कोथरूड) यांनी फिर्याद दिली आहे. त्यावरुन त्यांच्याविरुद्ध फसवणूक, महाराष्ट्र ठेवीदारांचे हितसंबंध कायद्यानुसार (कलम तीन) (एमपीआयडी) गुन्हा दाखल करण्यात आला आहे.

- MPSCच्या परीक्षेला सामोरं जाण्याआधी...; आंदोलनानंतर उमेदवारांना तज्ज्ञांच्या टिप्स​

पोलिसांनी दिलेल्या माहितीनुसार, फिर्यादी कुटे यांना 2017 मध्ये सोन्यात गुंतवणूक करायची होती. त्यावेळी त्यांना सोन्यामध्ये गुंतवणूक केल्यास आकर्षक आणि चांगला परतावा मिळेल, असे सराफी व्यावसायिक मराठे यांनी सांगितले होते. त्यामुळे कुटे यांनी 37 लाख 80 हजार रुपये गुंतवले होते. तर कुटे यांच्या सोलापूरमधील नातेवाईकांनी 25 लाख रुपये गुंतविले होते. मराठे यांच्याकडे कुटे यांच्यासह नातेवाईकांनी एक कोटी पाच लाख 80 हजार रुपये गुंतवले होते.

- पत्नी नोकरी करण्यास सक्षम असली तरी पोटगी द्यावीच लागेल; हायकोर्टाचा निर्णय​

कुटे आणि त्यांच्या नातेवाईकांनी गुंतवणूक केल्यानंतर त्यांना कोणत्याही प्रकारचा परतावा देण्यात आला नाही. फसवणूक झाल्याचे निदर्शनास आल्यानंतर त्यांनी पोलिसांकडे तक्रार अर्ज दिला होता. त्यानुसार फसवणूक आणि महाराष्ट्र ठेवीदारांचे हितसंबंध कायदा (एमपीआयडी) कलम तीन नुसार गुन्हा दाखल करण्यात आला आहे. या प्रकरणातचा तपास पोलिस निरीक्षक बडे करत आहेत.

मिलिंद मराठेंचा पाच महिन्यांपूर्वीच मृत्यू
"मराठे ज्वेलर्स'चे मालक मिलिंद मराठे यांनी त्यांच्या लक्ष्मी रस्त्यावरील सराफी दुकानातच स्वत:वर पिस्तुलातून गोळी झाडून आत्महत्येचा प्रयत्न केला होता. या घटनेत गंभीर जखमी झाल्याने त्यांच्यावर खासगी रुग्णालयात उपचार सुरू होते. उपचारादरम्यान त्यांचा मृत्यू झाला होता.

- पुण्याच्या बातम्या वाचण्यासाठी येथे ► क्लिक करा

(Edited by: Ashish N. Kadam)