लोणी काळभोर (पुणे) : हवेली तालुक्‍यातील कदमवाकवस्ती येथे दोन दिवसांपूर्वी पुण्याहून उपचारासाठी आलेली एक 45 वर्षीय महिला कोरोनाबाधीत असल्याचे आढळून आले आहे.

संबंधित महिलेच्या संपर्कात तब्बल 27 जण आले आहेत. त्यामध्ये तिच्या दोन जावयांचा समावेश आहे. त्यामुळे कदमवाकवस्ती परिसरात कोरोनाचा धोका मोठ्या प्रमाणात वाढला आहे. एकट्या कदमवाकवस्ती ग्रामपंचायत हद्दीत मागील चार दिवसात तब्बल चार जण कोरोनाबाधीत असल्याचे निष्पन्न झाले आहे. त्यामुळे लोणी काळभोरसह पूर्व हवेलीत भीतीचे वातावरण पसरले आहे. 

पुण्याच्या इतर बातम्या वाचण्यासाठी येथे क्लिक करा

पुण्यातील लोहियानगर परिसरात राहणारी एक महिला मागील आठ दिवसांपासून आजारी आहे. पुण्यात पुरेसे उपचार न मिळाल्याने ती कदमवाकवस्ती परिसरात राहणाऱ्या दोन जावयांकडे तीन दिवसांपूर्वी राहण्यास आली होती. दोन दिवसांपूर्वी तिच्या छातीत दुखू लागले. त्यामुळे जावयांनी तिला फुरसुंगी मार्गावरील एका खासगी रुग्णालयात उपचारासाठी दाखल केले होते. तेथे तिची रक्त तपासणी व एक्‍सरे काढून पुढील उपचारासाठी हडपसर येथील एका खासगी रुग्णालयात पाठवण्यात आले. मात्र, संबंधित रुग्णालयातील उपचार परवडणार नसल्याने तिला गोळीबार मैदान (पुणे) येथील शासकीय रुग्णालयात नेले. तेथे तपासणीत तिला कोरोनाची लागण झाली असल्याचे रविवारी (ता. 3) रात्री अकरा वाजता निष्पन्न झाले. 

दिल्लीत अडकलेल्या विद्यार्थ्यांना दिलासा

संबंधित महिला कोरोनाबाधीत असल्याचे निष्पन्न होताच कदमवाकवस्ती ग्रामपंचायत प्रशासन व आरोग्य विभागाच्या कर्मचाऱ्यांनी महिलेचे जावई राहत असलेली वस्ती रविवारी (ता. 3) रात्री अकरा वाजता सील केली. तसेच वस्तीत निर्जंतुकीकरण केले. लोणी काळभोर प्राथमिक आरोग्य केंद्राचे आरोग्य अधिकारी डॉ. डी. जे. जाधव यांनी कोरोनाबाधीत महिलेच्या संपर्कात आलेल्या दोन जावायांना तत्काळ कोरोनाच्या तपासणीसाठी पुण्यातील शासकीय रुग्णालयात हलविले आहे. 

याबाबत डॉ. जाधव यांनी माहिती दिली की, संबंधित महिलेच्या संपर्कात तिच्या दोन जावायांसह तब्बल 27 जण आल्याची प्राथमिक माहिती मिळाली आहे. रविवारी रात्री अकरा वाजण्याच्या सुमारास महिलेचा कोरोनाचा रिपोर्ट मिळताच तिला उपचारासाठी विविध रुग्णालयात घेऊन जाणाऱ्या दोघांना तत्काळ कोरोनाच्या टेस्टसाठी हलविले आहे. उर्वरित पंचवीस जणांनाही आज (सोमवारी) दुपारी पुण्यात नेण्यात येणार आहे. महिलेचे जावई राहत असलेल्या परिसरात घरोघरी जाऊन आशा सेविकांच्या माध्यमातून माहिती घेतली जाणार आहे. 

पुणे शहरात मागील महिनाभरापासून कोरोनाने धुमाकूळ घातला आहे. त्यामुळे पुण्यात येणारे व जाणारे रस्ते मागील काही दिवसांपासून पूर्णपणे बंद केले आहेत. कवडीपाट टोलनाक्‍यावर हडपसर व लोणी काळभोर पोलिस डोळ्यात तेल घालून येणाऱ्या जाणाऱ्यांची चौकशी करत आहे. मात्र, तरीही महिला एवढ्या मोठ्या बंदोबस्ताचा अडथळा पार करून येथे पोहोचली कशी? हा सवाल उपस्थित होत आहे.