पुणे : महिला पोलिस कर्मचाऱ्यांना पोलिस दलातील सेवा करण्याबरोबरच त्यांना त्यांची कौटुंबिक जबाबदारीही चांगल्या पद्धतीने पार पाडता यावी, यासाठी ग्रामीण पोलिस दलातील महिला पोलिसांना सुट देण्यात आली आहे. त्यामुळे त्यांना आता 12 तासांऐवजी 8 तास कर्तव्य बजवावे लागणार असून साडेतीनशे महिला पोलिस कर्मचाऱ्यांना त्याचा फायदा होईल, अशी माहिती ग्रामीण पोलिस दलाचे पोलिस अधिक्षक डॉ.अभिनव देशमुख यांनी दिली.

पोलिस दलात कर्तव्य बजावत असलेल्या महिला पोलिस कर्मचाऱ्यांना सण, उत्सव, बंदोबस्त, गंभीर गुन्हे या निमित्ताने वर्षभरातून अनेकवेळा ज्यादा तास कर्तव्य बजवावे लागते. त्यामुळे त्यांच्या कौटुंबिक जबाबदारीवर त्याचा परिणाम होतो, तसेच त्याचा त्यांच्या कर्तव्यावरही परिणाम होतो. याबाबत पोलिस महासंचालक संजय पांडे यांनी पोलिस दलातील महिला अमंलदारांना येणाऱ्या अडचणींचा सहानभुतीपुर्वक विचार त्यांना 12 तासांऐवजी 8 तास कर्तव्य बजावण्यास सांगावे, असा आदेश दिला होता. त्या आदेशानुसार, ग्रामीण पोलिस दलाचे पोलिस अधिक्षक डॉ.अभिनव देशमुख यांनी याबाबतच्या सुचना प्रशासनाला दिल्या.

पुणे ग्रामीण पोलिस दलातील महिल पोलिसांना बुधवारपासून (ता.1 ) आठ तासच कर्तव्यावर हजर रहावे लागणार आहे. डॉ. देशमुख यांनी दिलेल्या या आदेशाचे महिला पोलिस कर्मचाऱ्यांनी जोरदार स्वागत केले आहे. हा प्रयोग यशस्वी झाल्यास पुरूष अमंलदारांना देखील आठ तासाचे कर्तव्य देण्याबाबत विचार सुरू असल्याचे संकेत डॉ. देशमुख यांनी दिले आहेत.

पोलिस महासंचालकांनी महिला पोलिस कर्मचाऱ्यांना त्यांची सेवा बजावण्याबरोबरच कौटुंबिक जबाबदारीसाठीही वेळ देता यावा, यासाठी 8 तासाच्या कामाचे आदेश दिले होते. त्यानुसार आम्ही ग्रामीण पोलिस दलातील साडे तीनशे महिला पोलिसांना आठ तास कर्तव्य बजावण्याबाबतचे सुचना दिल्या आहेत.''

- डॉ.अभिनव देशमुख, पोलिस अधिक्षक, पुणे ग्रामीण पोलिस