इंदापूर : कांदलगाव ( ता. इंदापूर) ग्रामपंचायतीच्या वतीने महात्मा गांधी जयंती निमित्त साऊ जिजाऊ च्या लेकींनी स्वच्छतेतून समृद्धीची शपथ घेतली. गावातील महिला बचत गट उत्पादित मालास बाजारपेठ मिळवून देवूअशी ग्वाही सरपंच रविंद्र पाटील यांनी दिली.

राष्ट्रपिता महात्मा गांधी यांच्या प्रतिमेचे पूजन सरपंच रविंद्र पाटील, उपसरपंच तेजमाला बाबर यांच्या हस्ते करण्यात आले. यावेळी ग्रामपंचायत सदस्या कमल राखुंडे,कोंडाबाई जाधव, रेखा बाबर, किसन सरडे, विजय सोनवणे,उल्हास पाटील,दशरथ बाबर,महेश धुमाळ, हनुमंत चव्हाण, गावसमन्वयक निलोफर पठाण उपस्थित होते. यावेळी ग्रामसेविका स्वाती चव्हाण यांनी उपस्थितांना स्वच्छतेची शपथ दिली. गावातील महिला बचतगटांनी बनवलेले पदार्थ सरपंच रविंद्र पाटील यांना भेट देण्यात आले.

सरपंच रविंद्र पाटील पुढे म्हणाले,कांदलगावा तील महिलांनी चालू केलेल्या व्यवसायाला जास्तीत जास्त बाजारपेठ उपलब्ध करून देण्यासाठी ग्रामपंचायत प्रयत्न करत आहे. इंदापूर येथील "साऊ-जिजाऊ" घरकुल मार्ट येथे हे साहित्य विक्रीसाठी ठेवण्यात येणार आहे. सद्यस्थितीला कांदलगावातील महिला आर्थिकदृष्ट्या साक्षर झाल्या असून त्यांना सक्षम केले जाईल."खेड्याकडे चला" हा गांधीजीचा हेतु बचतगट चळवळीतून नक्कीच साध्य होईल.

यावेळी विद्या सोनवणे,मुनेरा नायकुडे,स्वाती ननवरे,लक्ष्मी कसबे,फातीमा शेख,दिपाली कांरडे,माधवी काशिद,रेणुका काशीद,शालन सोनवणे,दमयंती राऊत,द्रौपदी जगदाळे,विद्या सरडे या बचतगट महिलांनी बनवलेले पदार्थ व वस्तूंचे सादरीकरण केले. सूत्रसंचालन ग्रामसेविका स्वाती चव्हाण यांनी तर आभार पांडुरंग इंगळे यांनी मानले.