सुपे : बारामती शहर व तालुक्यात काल गुरूवारी (ता.२३) कोरोना(corona) संसर्ग झालेला एकही रूग्ण आढळला नाही. ही शून्य आकडेवारी सर्वांचे मनोबल व उत्साह वाढवणारी आहे. तालुका व शहर मिळून आज ३२ रूग्ण उपचार घेत आहेत.गेल्या वर्षी डिसेंबरमध्ये कोरोनाच्या रूग्णांची (corona patient)संख्या मोठी होती. त्या तुलनेत गेल्या महिन्यात म्हणजे नोव्हेंबर (ता.२३) रोजी तालुक्यातील कोरोना रूग्णांची संख्या १० होती तर कालची संख्या शून्य आली आहे. कोरोनाची ही शून्य आकडेवारी दिलासा देणारी असली तरी ओमीक्रॉनचा(omicron) धोका वाढत आहे. तज्ञांच्या अंदाजानुसार फेब्रुवारी महिन्यात या संख्येत मोठी वाढ होणार असल्याचा इशारा आहे. यावर लसीकरण प्रभावी असल्याने राज्याचे उपमुख्यमंत्री अजित पवार(deputy cm ajit pawar) विविध कार्यक्रमांमधून राहिलेल्या नागरिकांनी लसीकरण (vaccination)करून घेण्याचे आवाहन करत आहेत.

गुरूवारी (ता.२३) बारामती शहर व तालुक्यात २५३ जणांची तपासणी करण्यात आली. तीत एकाही रूग्णाला कोरोनाचा संसर्ग झाल्याचे आढळून आले नसल्याची माहिती तालुका आरोग्य अधिकारी डॉ.मनोज खोमणे यांनी दिली. ते म्हणाले - लसीकरणाकडे दुर्लक्ष करू नये. गावोगोवी लस उपलब्ध करण्यात आली आहे. ज्यांचा पहिला डोस राहिला असेल त्यांनी व ज्यांचे पहिला डोस घेऊन ८४ दिवस पूर्ण झाले आहेत त्यांनी लसीचा दुसरा डोस घ्यावा. गर्दीत जाणे टाळावे. मास्कचा वापर करावा.

तालुक्यातील एकूण रूग्ण संख्या ३० हजार ५९५ पैकी बरे झालेले रूग्ण २९ हजार ७८८. मृत्यू ७८०. म्युकर मायकॉसिसचे बारामती तालुक्यातील ३१ अधिक इतर तालुक्यातील ९ मिळून ४० रूग्ण असून, पैकी उपचार घेणारा एकही रूग्ण नाही.