Punjab Assembly Election 2022 : देशातील पाच राज्यांत विधानसभा निवडणूक (Assembly Election 2022) होत आहेत. याच दरम्यान मुख्यमंत्री अरविंद केजरीवाल (Arvind Kejriwal) यांचे जुने मित्र आणि कवी कुमार विश्वास (Kumar Vishwas) यांनी केजरीवालांवर गंभीर आरोप केलेत. या आरोपानंतर सर्व विरोधी पक्ष केजरीवालांना घेरण्याचा प्रयत्न करताहेत. दरम्यान, केजरीवाल यांनीही या आरोपांना चांगलंच प्रत्युत्तर दिलंय. एका वृत्तवाहिनीला दिलेल्या मुलाखतीत ते म्हणाले, निवडणुकीपूर्वी आम्हाला पराभूत करणारे सर्व पक्ष आता एकत्र आलेत. मी सर्वात मोठा दहशतवादी आहे, असं त्याचं म्हणणं आहे. मग, मला अद्याप का अटक केली नाही? असा सवाल करत त्यांनी विरोधकांवर निशाणा साधलाय.

शाळा, हॉस्पिटल (School, Hospital) बांधणारा मी जगातला सर्वात गोड दहशतवादी (Sweetest Terrorist) आहे आणि असा दहशतवादी जगात कधीच जन्माला आला नाही, असं केजरीवालांनी स्पष्ट केलंय. या आरोपांच्या पार्श्वभूमीवर केंद्र सरकार कवी आणि माजी आप नेते कुमार विश्वास यांच्या सुरक्षेचा आढावा घेणार असल्याचं समजतंय. केजरीवाल पुढे म्हणाले, तीन-चार दिवस झाले लोक म्हणताहेत की, केजरीवालांनी देशाचे दोन तुकडे करण्याचा 10 वर्षांचा प्लॅन बनवलाय. त्यांना एका तुकड्याचे पंतप्रधान व्हायचंय, असं त्यांचं म्हणणं आहे. मी 10 वर्षांपासून षडयंत्र रचत आहे. मग, विरोधकांच्या एजन्सी झोपल्या होत्या का? मला का अटक केली गेली नाही? असा सवाल त्यांनी उपस्थित केला.

पंजाबचे मुख्यमंत्री चन्नी (Charanjit Singh Channi) यांच्यावर आरोप करत केजरीवाल म्हणाले, मी दिल्लीत वीज-पाणी आणलं. रुग्णालयेही बांधली. परंतु, तुम्ही पंजाबसाठी काय केलं? चन्नी साहेब म्हणताहेत, भगवंत मान अशिक्षित आहे, दारुडा आहे, केजरीवाल काळा आहे, अशी टीका करताहेत. मला आणि भगवंत मान यांना शिव्या देताहेत. याचाच अर्थ काॅंग्रेसचा (Congress) 'खेळ' संपलाय. कारण, पंजाबचं भविष्य आता आपच्या हातात आहे, असं सांगत केजरीवालांनी सीएम चन्नी यांच्या जोरदार टीका केलीय.