नवी दिल्ली : पंजाबचे मुख्यमंत्री चरणजीतसिंह चन्नी यांच्यावर अवैध वाळू उत्खननप्रकरणी कुठलाही आरोप सिद्ध झाला नाही. त्यानंतर त्यांनी आम आदमी पक्षाचे प्रमुख आणि दिल्लीचे मुख्यमंत्री अरविंद केजरीवाल यांच्यावर जोरदार हल्लाबोल केला आहे. बेकायदेशीर वाळू उत्खननाशी संबंधित खोटे आरोप केजरीवाल यांनी केल्याचे चन्नी म्हणाले.

चन्नी यांच्या मतदारसंघातील चमकौर साहिबमधील कथित वाळू उत्खनन प्रकरणाची चौकशी करण्याची विनंती 'आप'ने पंजाबच्या राज्यपालांना केली होती. राज्यपालांनी ती विनंती मान्य करून पंजाब पोलिस प्रमुखांना तपासासाठी पाठवले. यानंतर चन्नी यांच्या मतदारसंघातील उपायुक्तांनी वाळू उत्खनन अंमलबजावणी अधिकाऱ्यांना पाठवलेल्या अहवालात वाळू उत्खननाची कोणतीही तक्रार किंवा रेकॉर्ड आलेले नसल्याचे सांगितले. सध्या खनिकर्म विभाग आणि पोलिसांकडून या प्रकरणाचा तपास सुरू राहणार आहे.

पोलिस उपायुक्तांच्या अहवालाचा संदर्भ देत चन्नी म्हणाले, "अरविंद केजरीवाल हे खोटे बोलणारे आहेत. त्यांनी माझ्यावर अनेक आरोप लावण्याचा प्रयत्न केला, पण एकही खरा नव्हता. त्यांनी माझ्याविरोधात राज्यपालांकडे तक्रार केली, त्यांनी चौकशीचे आदेश दिले. पण, नेहमी सत्याचा विजय होतो.''

ब्रिटिश भारताला लुटण्यासाठी आले होते, त्याचप्रमाणे केजरीवाल आणि इतर बाहेरचे लोक पंजाबला लुटण्यासाठी आले आहेत. पण पंजाबने जसं मुघल आणि ब्रिटिशांना हाकलून लावलं तसं केजरीवालांना देखील पंजाब जागा दाखवेल, असे चन्नी म्हणाले.