नवी दिल्ली : देशातील अब्जाधीश उद्योगपती गौतम अदानी यांनी उबर कंपनीसोबत सहकार्याचे सूतोवाच केले आहे. सध्या भारत दौऱ्यावर असलेले उबरचे सीईओ दारा खोसरोशाही यांची अदानी यांनी आज भेट घेतली आणि विविध मुद्द्यांवर चर्चा केली. भविष्यात अदानी समूह आणि उबेर कंपनी एकत्र येऊ शकतात, अशी शक्यता त्यांनी यावेळी माध्यमांशी बोलताना व्यक्त केली.

समाजमाध्यमावर, दोन्ही उद्योगपतींनी भारताची विकासगाथा आणि दूरदृष्टीबद्दल कौतुक केले. भारतात इलेक्ट्रिक वाहनांच्या वापराला चालना देण्यासाठी आपली कंपनी वचनबद्ध असून, यासाठी उद्योगसमूहासोबत भागीदारी पुढे नेण्यासाठी उत्सुक आहे, असे दारा खोसरोशाही यांनी म्हटले आहे.

‘ओएनडीसी’शी करार

नुकतीच खोसरोशाही यांनी ओपन नेटवर्क फॉर डिजिटल कॉमर्ससह (ओएनडीसी) सामंजस्य करारावर स्वाक्षरी केली आहे. उबर ॲपवर वाहन सेवा देण्यासाठी हा करार करण्यात आला आहे. ‘ओएनडीसी’सोबतच्या भागीदारीमुळे सर्व भारतीयांना विश्वासार्ह, सुरक्षित आणि वाजवी किमतीत वाहतूक सुविधा उपलब्ध करून देण्यात मदत मिळेल, असे त्यांनी म्हटले आहे.