पुणे : केंद्रीय अर्थमंत्री निर्मला सीतारामन यांनी आज २०२४ चे अंतरिम बजेट सादर केले. यामध्ये त्यांनी शिक्षण या विषयासाठी खालील गोष्टींचा उल्लेख केला आहे.

सीतारामन म्हणाल्या, विविध सरकारी विभागांतर्गत सध्या अस्तित्वात असलेल्या रुग्णालयाच्या पायाभूत सुविधांचा वापर करून भविष्यात अधिक वैद्यकीय महाविद्यालये स्थापन करण्याची आमचा प्रयत्न आहे.

यासाठी एक समिती स्थापन करण्यात येईल. या समितीच्या माध्यमातून वैद्यकीय क्षेत्रातील समस्यांचा आढावा घेण्यात येईल. ही समिती सरकारला शिफारसी करेन असेही सीतारामन यांनी त्यांच्या अर्थसंकल्पीय भाषणात सांगितले.

सीतारामन यांनी देशातील उच्च शिक्षणातील संस्थांचा उल्लेख त्यांच्या भाषणात केला. त्या म्हणाल्या, नवीन शैक्षणिक धोरणाच्या माध्यमातून (national education policy) परिवर्तन घडविण्याचा आमचा प्रयत्न आहे.

पीएम श्री शाळांच्या माध्यमातून दर्जेदार शिक्षणासोबतच विद्यार्थ्यांचा सर्वांगीण विकास आणि पालनपोषण केले जात आहे. कौशल्य भारतच्या माध्यमातून १ कोटी ८० लाख तरुणांना प्रशिक्षण दिलेले आहे. ५४ लाख तरुणांचे कौशल्य वाढवत पुन्हा प्रशिक्षित केले आहे.

देशात ३ हजार नवीन आयटीआय (ITI ) स्थापन केल्या आहेत. ७ आयआयटी, १६ आयआयआयटी ( IIIT), १६ AIIMS आणि ३९० विद्यापीठे मोठ्या संख्येने स्थापन झाली आहेत. या सोबतच येत्या काळात स्टार्टअप च्या माध्यमातून मोठी क्रांती घडविण्याचा आमचा प्रयत्न असल्याचेही त्यांनी सांगितले.