मुंबई : एचडीएफसी म्युच्युअल फंडाने एचडीएफसी मॅन्युफॅक्चरिंग फंड योजना दाखल केली आहे. ही योजना शुक्रवारी (ता.२६) खुली होणार असून, ती १० मे रोजी बंद होईल. उत्पादन क्षेत्रातील संभाव्य वाढीचा लाभ मिळवणे हा या ओपन-एंडेड इक्विटी योजनेचा उद्देश आहे.

या योजनेअंतर्गत उत्पादन क्षेत्रातील कंपन्यांच्या शेअर आणि शेअरसंबंधित सिक्युरिटीजमध्ये गुंतवणूक करण्यात येणार आहे. या योजनेचे व्यवस्थापन राकेश सेठिया करणार आहेत.

एचडीएफसी ॲसेट मॅनेजमेंट कंपनीचे ​​व्यवस्थापकीय संचालक आणि मुख्य कार्यकारी अधिकारी नवनीत मुनोत म्हणाले, ‘‘ग्राहकांच्या वेगवेगळ्या आर्थिक उद्दिष्टांसाठी आम्ही विविध योजनांद्वारे गुंतवणुकीचे अनेक पर्याय उपलब्ध करून दिले आहेत.

उत्पादन क्षेत्रातील वाढीचा फायदा घेण्यासाठी तयार असलेल्या कंपन्या निवडून त्यांच्या शेअरमध्ये दीर्घकालीन गुंतवणूक करणे आणि चांगला परतावा मिळवून देणे हा या फंडाचा उद्देश आहे.’’