अश्‍विन शहा

पश्‍चिम आशियातील ताज्या संघर्षामुळे सध्या सुरू असलेला भू-राजकीय तणाव आणखी वाढला असून, गुंतवणूकदार अस्वस्थ झाले आहेत. अशा परिस्थितीत गुंतवणूक कशी करावी, असा त्यांना संभ्रम पडला आहे. यावर एक उत्तम उपाय आहे तो म्हणजे मल्टिअ‍ॅसेट गुंतवणूक करणे.

यशस्वी गुंतवणुकीची गुरुकिल्ली

मल्टि-अ‍ॅसेट गुंतवणूक ही यशस्वी गुंतवणुकीची गुरुकिल्ली आहे. या नावातूनच याचे स्वरूप अगदी स्पष्ट होते. मल्टिअॅसेट गुंतवणूक म्हणजे विविध मालमत्ता वर्गांमध्ये केलेली गुंतवणूक. ही रणनीती सार्वकालीन असली, तरी अनिश्चित काळात तिचे महत्त्व अनेकपटींनी वाढते. शेअर, रोखे, सोने आणि रिअल इस्टेट यांसारख्या विविध मालमत्तावर्गांचे स्वतःचे वेगळे बाजारपेठ चक्र, मूल्यांकन निर्देशांक आणि उत्पन्न व जोखीम गुणोत्तर असते. ही वस्तुस्थिती असली, तरी दीर्घकालीन कमाल परतावा मिळविण्यासाठी आपल्या पोर्टफोलिओमध्ये मालमत्ता वैविध्य असणे महत्त्वाचे ठरते.

नांदेड येथील म्युच्युअल फंड वितरक भारत दायमा म्हणाले, की मल्टिअॅसेट गुंतवणुकीच्या पद्धतीतून गुंतवणूकदारांना सर्व मालमत्ता वर्गांचे फायदे मिळविण्यात मदत होते; तसेच मालमत्तांमधील एकवटलेली जोखीम दूर राहते. उदाहरणार्थ, मल्टिअॅसेट गुंतवणुकीमुळे हे सुनिश्चित होते, की गुंतवणूकदार शेअर बाजारातील उच्च वाढीच्या लाभांपासून वंचित राहणार नाहीत आणि त्याचवेळी कर्जरोख्यांसारख्या स्थिर मालमत्ता प्रकारांत गुंतवणूक केल्याने संतुलन साधले जाईल. याशिवाय, सोने हे महागाईविरूद्ध भरभक्कम आधार प्रदान करते, तर रिअल इस्टेटमधील गुंतवणूक अतिरिक्त उत्पन्नाचा लाभ देते. परिणामी, परतावा कमाल पातळीवर राहतो आणि एकवटलेल्या जोखमींच्या धक्क्यांपासून बचाव होतो.

मल्टिअ‍ॅसेट म्युच्युअल फंड

मल्टिअ‍ॅसेट गुंतवणुकीत प्रवेश मिळविण्याचा सर्वांत सोपा मार्ग म्हणजे मल्टिअॅसेट म्युच्युअल फंड. हा हायब्रीड श्रेणीतील गुंतवणूक पर्याय असून, त्यामध्ये गुंतवणूकदाराला एकाच फंडात तीन किंवा अधिक मालमत्ता वर्गांमध्ये प्रवेश मिळतो. अशा फंडांचे व्यावसायिक व्यवस्थापन आणि बाजारपेठेच्या परिस्थितीनुसार वितरण बदलण्याची त्यांची क्षमता यामुळे गुंतवणूकदारांचा वेळ आणि ऊर्जा वाचते.

मल्टिॲसेट श्रेणीतील एक सर्वांत जुना फंड म्हणजे आयसीआयसीआय प्रुडेन्शियल मल्टिअॅसेट म्युच्युअल फंड. या फंडाचा २१ वर्षांचा ट्रॅक रेकॉर्ड आहे आणि त्याने आपल्या गुंतवणूकदारांना नेहमीच चांगला परतावा दिला आहे. याच्या स्थापनेच्या वेळी १० लाख रुपयांची असलेली गुंतवणूक आता ५.५ कोटी रुपयांची असेल.

(लेखक पेलिकन इन्व्हेस्टमेंट लि.चे संचालक आहेत.)