G20 Summit 2023: G-20 परिषदेसाठी देशाची राजधानी दिल्लीत जोरदार तयारी सुरू आहे. 9 आणि 10 सप्टेंबरला होणाऱ्या या G20 परिषदेची सर्व तयारी पुर्ण झाली आहे. G20 परिषदेसाठी 'स्पेशल डिनर'साठी देशातील मोठ्या व्यावसायिकांना आमंत्रित करण्यात आल्याचे वृत्त रॉयटर्सने दिले होते. पीआयबी फॅक्ट चेकने ही बातमी दिशाभूल करणारी असल्याचे म्हटले आहे.

सरकारच्या पीआयबी फॅक्ट चेकने केलेल्या खुलाशानुसार, कोणत्याही व्यावसायिकाला डिनरसाठी आमंत्रित करण्यात आलेले नाही. ही बातमी पूर्णपणे खोटी आणि चुकीची आहे. रॉयटर्सच्या बातमीत असे म्हटले होते की मुकेश अंबानी आणि गौतम अदानी यांच्यासह भारतातील श्रीमंत उद्योगपती शनिवारी राजधानीत डिनरसाठी G20 मध्ये सामील होतील.

काय बातमी होती?

सूत्रांच्या हवाल्याने, रॉयटर्सच्या बातमीत म्हटले होते की, आमंत्रित केलेल्या 500 व्यावसायिकांमध्ये टाटा सन्सचे अध्यक्ष एन चंद्रशेखरन, अब्जाधीश कुमार मंगलम बिर्ला, भारती एअरटेलचे संस्थापक-अध्यक्ष सुनील मित्तल, रिलायन्स इंडस्ट्रीजचे अंबानी आणि अदानी समूहाचे अध्यक्ष आहेत.

पीआयबी फॅक्ट चेकने सोशल मीडियावर पोस्ट करून माहिती दिली

हा दावा खोटा असल्याची माहिती पीआयबी फॅक्ट चेकने एका पोस्टद्वारे दिली आहे. 9 सप्टेंबर रोजी भारत मंडपम येथे होणाऱ्या G20 डिनरमध्ये कोणत्याही व्यावसायिकाला आमंत्रित केले जाणार नाही. पीआयबी फॅक्ट चेकने आपल्या अधिकृत हँडलद्वारे सोशल मीडिया प्लॅटफॉर्म X वर ही माहिती दिली.

कोण उपस्थित राहणार?

चीनची अर्थव्यवस्था वेगाने मंदीकडे वाटचाल करत असताना आणि अमेरिकेसोबतचे व्यापार युद्ध शिगेला पोहोचले असताना G-20 परिषद भारतासाठी महत्त्वाची आहे.

या परिषदेमध्ये अमेरिकेचे अध्यक्ष जो बायडन, ब्रिटनचे पंतप्रधान ऋषी सुनक, सौदीचे क्राऊन प्रिन्स मोहम्मद बिन सलमान, कॅनडाचे पंतप्रधान जस्टिन ट्रुडो आणि जपानचे पंतप्रधान फुमियो किशिदा हे नवी दिल्लीत होणाऱ्या शिखर परिषदेत सहभागी होतील.