RBI Penalty: आरबीआयने चार बँकांना मोठा दंड ठोठावला आहे. आरबीआयने जारी केलेल्या आदेशात म्हटले आहे की, तपासादरम्यान या बँकांनी मार्गदर्शक तत्त्वांचे पालन केले नाही, त्यामुळे त्यांच्यावर दंड ठोठावण्यात आला आहे.

आरबीआयने सहकारी बँका असलेल्या या चार बँकांची नावे जाहीर केली आहेत. आरबीआयच्या म्हणण्यानुसार ज्या बँकांवर दंड ठोठावण्यात आला आहे त्यात बारामती सहकारी बँक, बेचराजी नागरिक सहकारी बँक, वाघोडिया अर्बन सहकारी बँक आणि विरमगाम मर्कंटाइल सहकारी बँक यांचा समावेश आहे.

कोणत्या बँकेला किती दंड?

बारामती सहकारी बँकेला 2 लाख आणि बेचराजी नागरीक सहकारी बँकेला 2 लाख रुपयांचा दंड ठोठावण्यात आल्याचे आरबीआयने म्हटले आहे. याशिवाय वाघोडिया अर्बन सहकारी बँकेला 5 लाख आणि विरमगाम मर्कंटाइल सहकारी बँकेला 5 लाख रुपयांचा दंड ठोठावण्यात आला आहे.

आरबीआयने बँकांना सूचना दिल्या आहेत

रिझर्व्ह बँकेने या सर्व बँकांना वेगवेगळ्या कारणांसाठी दंड ठोठावला असून सर्व बँकांना नियमांचे पालन करण्याचे निर्देश दिले आहेत. त्यांनी नियमांचे पालन न केल्यास, दंड आणि निर्बंध लादले जाऊ शकतात.

सायबर सुरक्षेचा प्रश्न

काही दिवसांपूर्वी रिझर्व्ह बँकेने सायबर सुरक्षेच्या नियमांकडे दुर्लक्ष करणाऱ्या आणखी एका बँकेला दंड ठोठावला होता. एपी महेश सहकारी बँकेला 65 लाखांचा दंड ठोठावला आहे. हॅकर्सनी या बँकांमध्ये घुसून 12.48 कोटी रुपयांची चोरी केली होती.

ग्राहकांवर काय परिणाम होईल?

रिझर्व्ह बँक ऑफ इंडियाच्या नियमानुसार ज्या बँकांवर दंड आकारला जातो. तो फक्त बँकांना भरावा लागतो. यामध्ये खातेदारांना कोणताही दंड भरावा लागत नाही. हा दंड फक्त बँकेलाच भरावा लागतो.