Tata Elxi Quarterly Results : टाटाची सर्व्हिस प्रोव्हायडर कंपनी टाटा एलक्सीने आपल्या तिमाही निकालांमध्ये शेअरहोल्डर्ससाठी ७०० टक्के डिव्हिडंट देण्याचा निर्णय घेतला आहे. एवढंच नाही तर कंपनीने २०२४-२५ या आर्थिक वर्षात साधारण दीड हजार ते दोन हजार इंजिनिर्सना नोकरी देण्याचं नियोजन केलं आहे.

मनीकंट्रोलच्या रिपोर्टनुसार, टाटा एलक्सीने आपल्या कॉन्फरन्स कॉलमध्ये मोठ्या भरतीची माहिती दिली आहे. टाटा एलक्सीने आपल्या भरती योजनेसंदर्भात सांगितलं की, आर्थिक वर्ष २०२५मध्ये साधारण १५०० ते २००० फ्रेशर्स इंजिनिर्सना कंपनी संधी देईल. कंपनीच्या गरजा आणि वेळांनुसार ही हायरिंग केली जाईल. आर्थिक वर्ष २०२३ मध्ये कंपनीने २ हजार १३५ जणांना जॉबची संधी दिली होती.

टाटा एलक्सीने मार्चमध्ये झालेल्या चौथ्या तिमाहीमध्ये १९६.९३ कोटी रुपयांचा नेट प्रॉफिट कमावला आहे. मागच्या आर्थिक वर्षाच्या याच तिमाहीच्या तुलनेमध्ये २.२ टक्क्यांची घट झालेली आहे. टाटा एलक्सीने शेअर बाजाराला दिलेल्या माहितीनुसार कंपनीने मागच्या आर्थिक वर्षाच्या समान कालावधीत २०१.५१ कोटी रुपयांचा शुद्ध नफा कमावला होता.

दरम्यान, टाटा एलक्सीच्या शेअर्समध्ये बुधवारी घसरण झाल्याचं पहायला मिळालं. ३८४.२० रुपये किंवा ५.२० टक्क्यांची घसरण बघायला मिळाली. त्यामुळे शेअरची किंमत ७ हजार ११ रुपयांपर्यंत आली. वर्ष २०२३ मधल्या आपल्या सर्वकालीन उच्चांकावरुन टाटा एलेक्सीच्या शेअर्समध्ये २० टक्के घसरण झाली आहे.