India's First AI-Enabled Powerchip Semiconductor Plant: सेमीकंडक्टर उद्योगात भारताने एक नवीन सुरुवात केली आहे. पंतप्रधान नरेंद्र मोदी यांनी सुमारे 1.25 लाख कोटी रुपयांच्या तीन सेमीकंडक्टर प्रकल्पांची पायाभरणी केली आहे. त्यापैकी 2 प्रकल्प गुजरातमध्ये आणि एक आसाममध्ये आहे. (Tata to set up country s first AI enabled Power chip semiconductor plant investment of Rs 91000 crore)

या प्रकल्पाची पायाभरणी करताना पंतप्रधान नरेंद्र मोदी म्हणाले - उज्ज्वल भविष्याच्या दिशेने आम्ही एक मोठे पाऊल उचलत आहोत. सेमीकंडक्टर प्रकल्प भारताला आत्मनिर्भरता आणि आधुनिकतेकडे घेऊन जाईल, असे पंतप्रधान म्हणाले.

भारतामध्ये सेमीकंडक्टर फॅब्स स्थापन करण्यासाठी सुधारित योजनेअंतर्गत, टाटा इलेक्ट्रॉनिक्स प्रायव्हेट लिमिटेड (TEPL) द्वारे धोलेरा स्पेशल इन्व्हेस्टमेंट रीजन (DSIR) येथे सेमीकंडक्टर फॅब्रिकेशन सुविधा सुरु केली जाईल.

एकूण 91,000 कोटी रुपयांच्या गुंतवणुकीसह हे देशातील पहिले व्यावसायिक सेमीकंडक्टर फॅब असेल. या प्रदेशात प्रत्यक्ष आणि अप्रत्यक्ष कुशल नोकऱ्या निर्माण होतील.

टाटा सन्सचे अध्यक्ष एन चंद्रशेखरन यांनी जानेवारी 2024 मध्ये 20 व्या व्हायब्रंट गुजरात समिटमध्ये धोलेरा येथे सेमीकंडक्टर फॅब तयार करण्याचा टाटा समूहाचा निर्णय जाहीर केला होता. नियोजित सेमीकंडक्टर फॅबवर भाष्य करताना ते म्हणाले, टाटा समूहाला अनेक क्षेत्रात आघाडीवर राहण्याची परंपरा आहे.

देशात 1 लाखांहून अधिक लोकांना रोजगार मिळणार

भारत प्रथमच ऑटोमोटिव्ह, कॉम्प्युटिंग, कम्युनिकेशन्स आणि आर्टिफिशियल इंटेलिजन्स मार्केटमधील देशांतर्गत आणि जागतिक ग्राहकांकडून वाढती चिपची मागणी पूर्ण करण्यास सक्षम असेल. ढोलेरा साठी टाटा समूहाच्या मल्टी-फॅब व्हिजनमध्ये 1,00,000 हून अधिक कुशल नोकऱ्या निर्माण होण्याची शक्यता आहे.

सेमीकंडक्टर असेंब्ली, टेस्टिंग, मार्किंग आणि पॅकेजिंग (ATMP) साठी सुधारित योजनेअंतर्गत टाटा इलेक्ट्रॉनिक्स प्रायव्हेट लिमिटेड (TEPL) द्वारे मोरीगाव, आसाम येथे आउटसोर्स सेमीकंडक्टर असेंब्ली आणि टेस्ट (OSAT) सुविधा स्थापन केली जाईल. त्याची एकूण गुंतवणूक अंदाजे 27,000 कोटी रुपये आहे.