Tax Saving Tips : आर्थिक वर्ष 2024-25 जवळपास संपायला आलंय आणि करदात्यांचे मुख्य लक्ष आता त्यांच्या कर कपात करण्यावर आणि बचतीत वाढ करण्यावर असते. 31 मार्च ही डेडलाइन जवळ येत असल्यामुळे योग्य वित्तीय नियोजन केल्यास केवळ कराची जबाबदारी कमी होणार नाही तर भविष्यातील गुंतवणुकीसाठी अतिरिक्त पैसे देखील मिळवता येतील. त्यामुळे तुमचा कर वाचवण्यासाठी आणि बचतीत वाढ करण्यासाठी आम्ही तीन सोप्या आणि प्रभावी टिप्स सुचवल्या आहेत.

1. हाऊस रेंट अलाउन्स (HRA)

जर तुम्ही नोकरी करत असाल आणि तुमच्या पगारात हाऊस रेंट अलाउन्स (HRA) समाविष्ट असेल आणि तुम्ही भाड्याच्या घरात राहत असाल तर तुम्हाला कर कपात मिळवता येऊ शकते. आयकर अधिनियम, 1961 च्या कलम 10(13A) अंतर्गत, HRA वर कर कपात मिळवता येते. यासाठी तुमच्याकडे पगाराच्या रचनेत HRA असणे आवश्यक आहे. तसेच भाड्याच्या घराची पावती आणि शहराच्या आधारावर पात्रता तपासली जाते. ह्या लाभाचा पूर्ण फायदा घेण्यासाठी तुम्ही योग्य प्रमाणपत्रे सादर केली पाहिजे.

2. 80C अंतर्गत गुंतवणूक पर्यायांचा वापर करा (ELSS, PPF, NSC)

आयकर अधिनियम, 1961 च्या कलम 80C अंतर्गत तुम्हाला विविध गुंतवणूक पर्यायांवर कर कपात मिळवता येते. यामध्ये तुम्ही इक्विटी लिंक्ड सेव्हिंग स्कीम (ELSS), पब्लिक प्रोविडेंट फंड (PPF), राष्ट्रीय बचत प्रमाणपत्र (NSC), जीवन विमा प्रीमियम आणि टॅक्स सेव्हिंग फिक्स्ड डिपॉझिट्स यामध्ये गुंतवणूक करू शकता. या सर्व गुंतवणुकीवर तुम्ही एकूण 1,50,000 रुपयांपर्यंत कर कपात मिळवू शकता. त्याचप्रमाणे राष्ट्रीय पेन्शन योजना (NPS) अंतर्गत तुम्हाला 80CCD(1B) च्या माध्यमातून 50,000 रुपयांपर्यंत अतिरिक्त कपात मिळू शकते.

3. 80D अंतर्गत आरोग्य विमा प्रीमियमवर कर कपात

आयकर अधिनियम, 1961 च्या कलम 80D अंतर्गत तुम्ही तुमच्या, तुमच्या पत्नी, मुलं आणि पालकांसाठी घेतलेल्या आरोग्य विमा प्रीमियमवर 25,000 रुपयांपर्यंत कर कपात मिळवू शकता. यासाठी प्रमाण वृद्ध नागरिकांसाठी ही मर्यादा 50,000 रुपयांपर्यंत वाढवली आहे. त्यामुळे आरोग्य विमा प्रीमियम भरताना या कर बचतीच्या सोयीचा उपयोग करा.

आर्थिक वर्ष समाप्त होण्याच्या मार्गावर असताना या तिन्ही टिप्स तुम्हाला तुमचा कर वाचवण्यासाठी आणि बचतीत खूप मदत करू शकतात. त्यामुळे 31 मार्चच्या आधी योग्य नियोजन करा आणि जास्तीत जास्त फायदे मिळवा.