Share Market Closing 7 June 2023: आजचे सत्र भारतीय शेअर बाजारासाठी अतिशय चांगले होते. गुंतवणूकदारांच्या खरेदीमुळे बाजारातील दोन्ही प्रमुख निर्देशांक ऐतिहासिक पातळीच्या जवळ बंद झाले.

आजच्या ट्रेडिंग सत्राचा स्टार परफॉर्मर निफ्टी आहे, 2023 मध्ये प्रथमच 18,700 चा टप्पा पार केला आहे. त्यामुळे सेन्सेक्सने 63,000 चा आकडा पार केला.

आजच्या व्यवहाराअंती BSE सेन्सेक्स 390 अंकांच्या वाढीसह 63,182 वर बंद झाला आणि राष्ट्रीय शेअर बाजाराचा निफ्टी 138 अंकांच्या तेजीसह 18,737 अंकांवर बंद झाला.

आजच्या व्यवहारात बाजारातील सर्वच क्षेत्रातील शेअर्समध्ये वाढ झाली आहे. बँकिंग, ऑटो, आयटी, फार्मा, एफएमसीजी, मेटल्स, एनर्जी, रिअल इस्टेट, इन्फ्रा, कंझ्युमर ड्युरेबल्स, हेल्थकेअर, ऑइल आणि गॅस क्षेत्रातील शेअर्समध्ये जबरदस्त वाढ झाली आहे.

निफ्टी स्मॉल कॅप आणि मिड कॅप शेअर्समध्ये जोरदार वाढ झाली. निफ्टीच्या मिडकॅपमध्ये 354 अंकांची तेजी होती.

गुंतवणूकदारांच्या संपत्तीत वाढ:

आजच्या व्यवहारात गुंतवणूकदारांच्या संपत्तीत नेत्रदीपक झेप घेतली आहे. BSE वर सूचीबद्ध कंपन्यांचे मार्केट कॅप वाढून रु. 289.07 लाख कोटी झाले, जे मंगळवारी रु. 286.62 लाख कोटी होते. म्हणजेच आजच्या सत्रात गुंतवणूकदारांच्या संपत्तीत 2.45 लाख कोटी रुपयांची वाढ झाली आहे.

सेन्सेक्सवर 'या' शेअर्समध्ये तेजी:

नेस्ले इंडियाचा शेअर बीएसई सेन्सेक्सवर सर्वाधिक 2.97 टक्क्यांच्या वाढीसह बंद झाला. त्याचप्रमाणे टाटा स्टीलचे शेअर्स 2.29 टक्‍क्‍यांनी, टाटा मोटर्सचे शेअर्स 2.21 टक्‍क्‍यांनी आणि भारती एअरटेलचे शेअर्स 1.70 टक्‍क्‍यांनी वाढले.

याशिवाय लार्सन अँड टुब्रो, पॉवरग्रीड, एनटीपीसी, टीसीएस, हिंदुस्तान युनिलिव्हर लिमिटेड, टेक महिंद्रा, इन्फोसिस, अॅक्सिस बँक, टायटन, विप्रो, रिलायन्स इंडस्ट्रीज, एसबीआय, अल्ट्राटेक सिमेंट आणि एशियन पेंट्स वाढीसह बंद झाले.

सेन्सेक्सवर 'या' शेअर्समध्ये घसरण:

कोटक महिंद्रा बँक, मारुती, बजाज फायनान्स, महिंद्रा अँड महिंद्रा आणि आयसीआयसीआय बँकेचे शेअर्स सेन्सेक्सवर घसरणीसह बंद झाले.