Share Market Opening Latest Update 25 September 2023: आठवड्याच्या पहिल्याच दिवशी शेअर बाजाराने सकारात्मक सुरुवात केली. मात्र, काही मिनिटांतच बाजारातील प्रमुख निर्देशांक घसरले. BSE सेन्सेक्स जवळपास 100 अंकांनी घसरून 65,900 च्या पातळीवर आला आहे. निफ्टीही किंचित घसरला आणि 19,650 च्या खाली आला आहे.

बँकिंग-आयटी क्षेत्रात विक्री

बाजारातील मंदीमुळे आयटी आणि बँकिंग क्षेत्रात विक्री होत आहे. निफ्टीमध्ये अॅक्सिस बँकेचा शेअर 1.25 टक्क्यांच्या घसरणीसह टॉप लूझर आहे. तर, बजाज फायनान्सचे शेअर्स सुमारे 3 टक्क्यांनी वाढले आहेत. जीएसटी नोटीसमुळे डेल्टा कॉर्पचे शेअर्स 10 टक्क्यांच्या लोअर सर्किटवर घसरले.

सेन्सेक्सवर 'या' शेअर्समध्ये घसरण

बीएसई सेन्सेक्सच्या सुरुवातीच्या व्यवहारात, अॅक्सिस बँकेचे शेअर्स सर्वात मोठ्या घसरणीसह व्यवहार करत होते. त्याचप्रमाणे इन्फोसिस, भारती एअरटेल, इंडसइंड बँक, एचसीएल टेक, आयटीसी, लार्सन अँड टुब्रो, नेस्ले इंडिया, महिंद्रा अँड महिंद्रा, टायटन आणि टीसीएस यांचे शेअर्स घसरणीसह व्यवहार करत होते.

सेन्सेक्सवर 'या' शेअर्समध्ये तेजी

सेन्सेक्सच्या सुरुवातीच्या व्यवहारात, बजाज फायनान्स सर्वात जास्त 1.39 टक्के वाढीसह व्यवहार करत होता. त्याचप्रमाणे बजाज फायनान्स, जेएसडब्ल्यू स्टील, एसबीआय, सन फार्मा, कोटक महिंद्रा बँक, एनटीपीसी, टाटा मोटर्स, रिलायन्स इंडस्ट्रीज, विप्रो, मारुती आणि एचडीएफसी बँकेचे तेजीसह व्यवहार करत होते.

NSE IX वर, गिफ्ट निफ्टी 45 ​​अंकांच्या किंवा 0.23 टक्क्यांच्या वाढीसह 19,687.50 अंकांवर व्यवहार करत होता. यावरून सोमवारी दलाल स्ट्रीटची सुरुवात सकारात्मक होऊ शकते, असे संकेत मिळत होते. मात्र, सुरुवातीच्या सत्रात सेन्सेक्स 95 अंकांनी घसरला. त्याच वेळी निफ्टी 19,670 अंकांच्या खाली घसरला.

अमेरिकन बाजारात घसरण सुरूच

शुक्रवारी अमेरिकन बाजारही घसरणीसह बंद झाला. डाऊ जोन्स इंडस्ट्रियल एव्हरेज 0.31 टक्क्यांनी खाली आले. तर Nasdaq कंपोझिट इंडेक्समध्ये 0.09 टक्के आणि S&P 500 इंडेक्समध्ये 0.23 टक्के घसरण दिसून आली. सोमवारच्या व्यापार सत्रात आशियाई बाजारांमध्ये संमिश्र कल दिसून येत आहे.