Mumbai News : भारतीय शेअर बाजारात पुढील आठवड्यात सात ‘आयपीओ’ दाखल होणार असून, गुंतवणूकदारांना विविध क्षेत्रांतील कंपन्यांमध्ये गुंतवणुकीची संधी उपलब्ध होणार आहे. यामध्ये दोन मेनबोर्ड म्हणजे मुख्य श्रेणीत दाखल होणारे ‘आयपीओ’ असून, इतर पाच ‘आयपीओ’ ‘एसएमई’ प्लॅटफॉर्मवर दाखल होणार आहेत.

दोन मुख्य ‘आयपीओ’मध्ये पॉप्युलर व्हेइकल्स आणि क्रिस्टल इंटिग्रेटेड यांचा समावेश आहे. ‘एसएमई’ श्रेणीतील ‘आयपीओ’मध्ये ईपीसी, सिग्नोरिया क्रिएशन्स, रॉयल सेन्स, एव्हीपी इन्फ्राकॉन आणि केपी ग्रीन इंजिनिअरिंग या कंपन्यांचा समावेश आहे. ‘एसएमई’ प्लॅटफॉर्मवर दाखल होणाऱ्या या पाच कंपन्यांना ३०० कोटी रुपयांच्या निधीची अपेक्षा आहे.

पॉप्युलर व्हेइकल्स अँड सर्व्हिसेस लि. चा ‘आयपीओ’ मंगळवारी (ता. १२) खुला होणार असून, तो १४ मार्च रोजी बंद होईल. कंपनी या ‘आयपीओ’द्वारे ६०५ कोटी रुपये उभारण्याची योजना आखत आहे. क्रिस्टल इंटिग्रेटेड लि. चा ‘आयपीओ’ गुरुवारी (ता.१४) खुला होणार असून, तो १८ मार्च रोजी बंद होईल.

‘ईपीसी’चा ‘आयपीओ’ सोमवारी (ता. ११) खुला होईल आणि १३ मार्च रोजी बंद होईल. यात प्रति शेअर ७१ ते ७५ रुपये किंमतपट्टा निश्चित करण्यात आला आहे. ‘एव्हीपी इन्फ्राकॉन’चा ‘आयपीओ’ १३ मार्च रोजी खुला होईल आणि १५ मार्च रोजी बंद होईल. रॉयल सेन्स आणि सिग्नोरिया क्रिएशन हे ‘आयपीओ’ मंगळवारी (ता. १२) खुले होतील आणि १४ मार्च रोजी बंद होतील.

सिग्नोरिया क्रिएशनच्या ‘आयपीओ’साठी प्रति शेअर ६१ ते ६५ रुपये किंमतपट्टा निश्चित करण्यात आला आहे, तर रॉयल सेन्ससाठी प्रति शेअर ६८ रुपये किंमत निश्चित करण्यात आली आहे.

केपी ग्रीन इंजिनिअरिंगचा ‘आयपीओ’ १५ मार्च रोजी खुला होईल आणि १९ मार्च रोजी बंद होईल. प्रति शेअर १३७ ते १४४ रुपये किंमतपट्टा निश्चित करण्यात आला आहे. कंपनी या इश्यूद्वारे १९० कोटी रुपयांचे भांडवल उभारण्याचा विचार करत आहे.