सातारा : सातारकरांसाठी सध्या कसोटीचा काळ असून, या कठीण प्रसंगात डगमगून न जाता सामाजिक सलोखा व ऐक्याची भूमिका घेऊन आपण शांतीच्या मार्गाने वाटचाल करूया. समाज माध्यमांमध्ये कोणत्याही आक्षेपार्ह पोस्ट प्रसारित न करता सामाजिक व धार्मिक तेढ निर्माण न करत जातीय सलोखा व ऐक्य अबाधित ठेवावे, असे आवाहन भाजप आमदार शिवेंद्रसिंहराजे भोसले (Shivendraraje Bhosale) यांनी केले.

पुसेसावळीच्या (Pusesawali Riots) घटनेच्या पार्श्वभूमीवर जिल्ह्यात तणावपूर्ण शांतता आहे. या पार्श्वभूमीवर आमदार शिवेंद्रसिंहराजे यांनी सातारकरांना प्रसिद्धी पत्रकाच्या माध्यमातून शांतता राखण्याचे आवाहन केले आहे.

शिवेंद्रसिंहराजे यांनी म्हटले, की सातारा ही शूरांची, वीरांची तसेच शांत व संयमी लोकांची भूमी आहे. जिल्ह्याला एक वैभवशाली सामाजिक, शैक्षणिक, ऐतिहासिक व सांस्कृतिक परंपरा आहे. कोणत्याही प्रकारचे अनुचित प्रकार आजवर जिल्ह्यात यापूर्वी घडलेले नाहीत.

सद्यःस्थितीत जिल्ह्यात अतिशय अशोभनीय व निंदनीय घटना घडली आहे; परंतु या सर्वातून पुढे जाताना आपण सर्वांनी शांती, सलोखा व सहिष्णुता अबाधित ठेवायची आहे. समाजात शांतता प्रस्थापित करण्याचा व असुरक्षित वातावरण निवळण्याचा हाच एकमेव मार्ग आहे. सातारकरांच्या दृष्टीने अत्यंत कसोटीचा काळ आहे.

या कठीण प्रसंगात डगमगून न जाता सामाजिक सलोखा व ऐक्याची भूमिका घेऊन आपण शांतीच्या मार्गाने वाटचाल करत राहूया. कोणत्याही अफवांवर विश्वास न ठेवता समाज माध्यमात कोणत्याही प्रकारची आक्षेपार्ह पोस्ट प्रसारित न करता, तसेच धार्मिक तेढ निर्माण न करता जातीय सलोखा ठेवावा, असे आवाहन त्यांनी केले आहे.