गेल्या काही दिवसांपासून अपघातांच सत्र सुरूच आहे. साताऱ्यातून अपघाताची एक मोठी दुर्घटना समोर आली आहे. पुण्याहून महाबळेश्वरच्या दिशेने निघालेल्या बसचा बुवा साहेब मंदिराजवळ अचानक ब्रेक फेल झाल्यामुळे बसचा अपघात झाला आहे. या अपघातात एका महिलेचा मृत्यू झाला आहे.

मिळालेल्या माहितीनुसार, बस पसरणी घाटात अवघड वळणावर असताना अचानक ब्रेक फेल झाल्यामुळे बस घाटात मागच्या दिशेला गेली. यावेळी पाठीमागून येत असलेल्या एका दुचाकी स्वाराच्या अंगावर आली. त्यामुळे दुचाकीवरील एका महिलेसह अन्य २ जण बसखाली आले. या दुर्घटनेत दुचाकीवरील महिलेचा मृत्यू झाला आहे.

दरम्यान बस चालकाने बस नियंत्रीत करण्याचा प्रयत्न केला. मात्र, दुर्दैवाने बसखाली दुचाकी आल्यामुळे प्रिती बोधे यांचा या अपघातात दुर्दैवी मृत्यू झाला आहे. तसेच ब्रेक फेल झालेली बस कठड्यात अडकल्याने मोठी दुर्घटना टळली आहे. या बसमध्ये 20 ते 25 जण प्रवास करत होते अशी माहिती आहे. पोलिसांकडून पंचनामा झाला असून पोलिस अधिक तपास करत आहेत.