सातारा : जिल्ह्याला शांततेची परंपरा असून, यंदाचा गणेशोत्सव (Ganeshotsav) सर्वांनी मिळून संयम व शांततेने आनंदात पार पाडा. प्रशासन व नागरिकांत समन्वय राहण्यासाठी प्रशासनाने नागरिकांना समजून घेण्याची, सामंजस्याची भूमिका ठेवावी, असं आवाहन शंभूराज देसाई (Shambhuraj Desai) यांनी केले.

नागरिकांनी कायदा व सुव्यवस्था अबाधित राहावी, यासाठी प्रशासनाला सहकार्य करावे. गणेशोत्सव उत्साहात, धुमधडाक्यात व कोणतेही गालबोट न लावता पार पाडूया, असे आवाहनही पालकमंत्री शंभूराज देसाई यांनी केले. गणेशोत्सव व ईदच्या पार्श्वभूमीवर पालकमंत्री देसाई यांनी जिल्हा प्रशासन व पोलिस दलासोबत व्हिडिओ कॉन्फरन्सिंगद्वारे आढावा बैठक घेतली.

या वेळी जिल्हाधिकारी जितेंद्र डुडी, पोलिस अधीक्षक समीर शेख, अतिरिक्त पोलिस अधीक्षक बापू बांगर उपस्थित होते. जिल्ह्यातील सर्व प्रांताधिकारी, पोलिस उपअधीक्षक, तहसीलदार, ठाणे अंमलदार, पोलिस निरीक्षक दूरदृश्य प्रणालीद्वारे उपस्थित होते.

देसाई म्हणाले, ‘‘लोकांना कोणत्याही पद्धतीचा त्रास होऊ नये, यासाठी यंत्रणांनी नागरिकांशी सामंजस्याची भूमिका ठेवावी. जाणीवपूर्वक कोणी त्रास देण्याचा प्रयत्न करत असेल, तर अशांसाठी आपले अधिकार वापरावेत. ज्या ठिकाणी उत्सव काळात गर्दी होते, अशा ठिकाणी महिला, मुलींची विशेष काळजी घ्यावी. विसर्जनाच्या मिरवणुकीच्या वेळी यंत्रणांवर ताण येतो. या ठिकाणी सतर्क राहावे. मोठ्या आवाजाचे ध्वनिक्षेपक लावताना आवाजाची मर्यादा कोणी ओलांडू नये.’’

जितेंद्र डुडी म्हणाले, ‘‘गणेशोत्सवाच्या पार्श्वभूमीवर शांतता समितीतील सदस्यांबरोबर यंत्रणांनी सातत्याने समन्वय ठेवावा. पोलिस पाटील, कोतवाल, तलाठी यांच्याकडून सातत्याने माहिती घ्यावी. रोज बैठक घ्यावी. यंत्रणांनी कोणत्याही घटनेपासून अनभिज्ञ राहू नये.’’

समीर शेख म्हणाले, ‘‘गणेशोत्सव काळात चोख बंदोबस्त राहावा, यासाठी पोलिस आणि होमगार्ड यंत्रणा तैनात करण्यात येत आहे. गर्दीमुळे एखादी आपत्ती ओढवल्यास त्यावर तत्काळ उपाययोजना करण्यासाठी दळणवळण यंत्रणांशीही समन्वय ठेवण्यात येत आहे. गणेशोत्सव मंडळांना आचारसंहिता देण्यात आली आहे.

प्रत्येक पोलिस ठाण्यामध्ये सोशल मीडियावरील पोस्टवर लक्ष ठेवण्यासाठी सायबर सेल कार्यरत करण्यात आला आहे. गेली अनेक वर्षे गणेशोत्सव जिल्ह्यात अत्यंत चांगल्या पद्धतीने साजरा झाला असून, यंदाही गणेशोत्सव आणि ईद-ए-मिलाद हे सण अतिशय चांगल्या पद्धतीने व समन्वयाने साजरे करण्यात येतील.’’

तेढ निर्माण होणारे देखावे नकोत

यंदा जवळपास पाच हजार सार्वजनिक गणेशोत्सव मंडळे गणपती बसविणार आहेत. त्यामुळे मोठ्या प्रमाणावर गर्दी होणार आहे. गणेशोत्सव मंडळांना आचारसंहिता देण्यात आली असून, समाजात तेढ निर्माण होणारे देखावे उभे करू नयेत, असे आवाहन करून समीर शेख म्हणाले, ‘‘यासाठी पथके नियुक्त करण्यात आली आहेत. प्रत्येक पोलिस ठाण्यामध्ये सोशल मीडियावरील पोस्टवर लक्ष ठेवण्यासाठी सायबर सेल कार्यरत करण्यात आला आहे.’’