सातारा : मातीचा गंध आणि सुगंध आपल्याला शेतीकडे व आपल्या जन्मभूमीकडे खेचून आणतो. जेव्हा मी माझ्या जन्मभूमीत येतो तेव्हा माझे पाय आपोआप शेतीकडे वळतात, अशी भावना मुख्यमंत्री एकनाथ शिंदे (Eknath Shinde) यांनी व्यक्त केली.

दरे (ता. महाबळेश्वर) येथे यात्रेनिमित्त मुख्यमंत्री एकनाथ शिंदे गावी आले आहेत. काल ते दिवसभर आपल्या शेतीत रमले होते. या वेळी त्यांच्या हस्ते औषधी हळद, स्ट्रॉबेरी (Strawberry Farming), आंबे, काजू, चिकू, बटाटा, सफरचंद, अव्हॅकॅडो, अगरवूड अशी विविध प्रकारच्या फळझाडांची लागवड करण्यात आली आहे.

एकनाथ शिंदे म्हणाले, की शेतीत रमताना एक वेगळा आनंद मिळतो. थोड्या वेळासाठी का होईना; पण अन्य सर्व बाबी बाजूला राहतात. गाव, शेती, गावाकडची माणसं यांचे प्रत्येकाच्या आयुष्यात एक वेगळे महत्त्व असते. माणूस गावापासून कितीही दूर गेला, कितीही मोठा झाला तरी प्रत्येकाला आपल्या मातीबद्दल आपल्या गावाबद्दल, गावाकडील लोकांबद्दल प्रेम असते.

शेतकऱ्यांनी आर्थिक उत्पन्न वाढविणाऱ्या पिकांचे उत्पादन घ्यावे, असे सांगून सातारा जिल्ह्यात बांबू लागवड मोहीम मिशन मोडवर राबविण्यात येत आहे. जवळपास दहा हजार हेक्टर बांबू लागवडीचे प्रशासनाने उद्दिष्ट ठेवले आहे. कांदाटी खोऱ्यातील नागरिकांचे स्थलांतर रोखण्यासाठी येथे रोजगाराच्या संधी उपलब्ध करून देण्यात येत आहेत. हे खोरे निसर्गसंपन्न आहे. या खोऱ्यात वासोटा किल्ला, उत्तेश्वर मंदिर यासारखी विविध पर्यटन स्थळे आहेत. या पर्यटन स्थळांच्या विकासासाठी जिल्हाधिकारी जितेंद्र डुडी यांनी आराखडा तयार केला आहे.